Boletin di notisia, 3 di mart, 12:00 or
 

Elekshon munisipal na Hulanda
Na Hulanda urnanan a habri pa elekshon di konseho munisipal.Te awe nochi 9 or por vota. Na Groningen, Den Haag i Rotterdam por a vota for di promé ku un or di mardugá. Espesialmente Den Haag i Rotterdam a atrahé hopi votadó i asina ta parse ku nan a logra un meta importante: laga mas hoben bin votá. Polítika nashonal tradishonalmente ta influenshá e elekshonnan lokal.
i e biaha 'ki e fenómeno aki ta sali mas tantu na kla, asina lihe despues di PvdA su retiro for di gabinete. E pregunta ta si PvdA i partidonan di gobièrnu lo probechá di e krisis den gobièrnu, i si CDA i Christen Unie lo sinti esaki. Ademas tur hende ta warda resultado di e partido di Geert Wilders. Ta promé be ku PVV ta partisipá na elekshon munisipal, ma ta na Den Haag i Almere so nan ta partisipá. Den sombra di Wilders Trots op Nederland, e partido di Rita Verdonk, tambe ta partisipá pa promé be.

Koperashon CDA-PvdA no tin kredibilidat
Prome minister i lider di CDA Jan Peter Balkenende despues di elekshon pa parlamento no ke un gabinete huntu ku PvdA. Na e emisora di televishon RTL Z el a yama un koalishon nobo ku sosial demókratanan no muchu kreibel. Segun Balkenende e votadó lo no komprondé si algun luna despues di kaida di gabinete e sigui atrobe ku PvdA.

Lo no persiguí Lubbers pa intimidashon seksual
Definitivamente lo no denunsiá èks prome minister Ruud Lubbers pa intimidashon seksual di un empleado di Nashonnan Uní. Meskos ku korte di hustisia, korte di apelashon na New York a rechasá e denunsia di e muhé merikano. Motibu pa rechasá tabata ku Nashonnan Uní i nan personal ta inviolabel den tipo di kaso asina. E dama a bisa ku durante di un enkuentro na aña 2003 Lubbers, ku e tempu ei tabata komisario di Nashonnan Uni pa refugiado, a mishi kune na un manera no muchu desente. Un rapòrt interno di NU a duna e dama rason ma e sekretario general di e tempu ei, Kofi Annan, a haña ku no tabatin sufisiente prueba. Bou di preshon di e akusashonnan na aña 2005, Lubbers mes a baha.
 

Mas toke de keda na Chile
Na Chile a dekretá un toke de keda pa tres lugá mas, pa evitá sakeo. Awor tin shete lugá asina. Tur shete ta den e area ku a sufri un temblor i un tsunami djasabra último. Presidente Michelle Bachelet a subi e kantidat di militar den e areanan te 14.000. Nan mester parti artíkulonan di ayudo, pero tambe evitá sakeo ku na prinsipio tabata tuma lugá na siudat Concepcion. Situashon einan ta bou di kòntròl, Bachelet ta bisa. Entretantu grandura di e daño ta bira mas i mas evidente. Asina den e lugá kostal Curico, entre Santiago i Concepcion, nobenta porshento di e kasitanan di lodo den e sentro históriko a keda distruí. Ta ferwagt ku e kantidat di morto di mas o menos 800 lo subi ainda. E minister merikano di asuntunan eksterior Hillary Clinton a hasi un bishita kòrtiku na Chile. Entretantu el a sigui bai Brazil.
 

Mas hende muhé ku AIDS na Áfrika
E organisashon di Nashonnan Uni ku ta enkargá ku trato di HIV i AIDS, den añanan binidero ke pone atenshon riba posishon di hende muhé. Estadístika a demostrá ku entretantu hende muhé a bira e grupo mas vulnerabel. Den pais afrikano 60 porshento di e pashèntnan ku HIV ta hende muhé. Un kousa importante ta ku hende muhé hopi be ta víktima di violashon seksual. Unaids ta bai inkorporá e tópiko di violensha kontra hende muhé den nan programa di prevení HIV. E kantante Annie Lennox ta sostené e kampaña. E problema a kousa ku mundialmente AIDS ta e kousa di morto di mas importante bou di mucha muhé i muhé adulto entre 15 pa 49 aña.
 

Dos funshonario haltu detené pa trafikashon di droga na Guatemala
Na Guatemala a detené dos funshonario haltu di gobièrno den e lucha kontra trafikashon di droga. Ta trata di hefe di polis Baltazar Gomez i Nelly Barillas, e kabes di un organisashon speshal kontra droga den e pais. Hustisia di Guatemala ta sospechá ku nan dos ta involukrá den trafikashon di droga. Tambe nan lo ta involví den asesinato di 5 polis na mart di aña pasá. Guatemala i e pais bisiña Mehiko ya pa aña ta sufri bou di un ola di violensha relashoná ku droga. Guènnan ta rivalisá pa e miho rutanan den direkshon di Estados Unidos, e merkado di mas importante pa droga.
 

Hefe di polis di Dubai ke detené Netanyahu
E hefe di polis na Dubai ke pa arestá e promé minister di Israel Benjamin Netanyahu. Segun e, ta Netanyahu ta tras di e asesinato di un lider di Hamas, den un kamber di hotel na Dubai, na yanüari. Ya pa basta tempu ta pensa ku ta servisio sekreto di Israel, Mossad, ta tras di e asesinato. Israel ta bisa ku no tin prueba pa esaki. Pero pasobra e hefe di polis ta sigur di su kaso e ke pa saka un orden pa arestá e kabes di Mossad, Dagan, tambe. E asesinonan tabata usa pasaporte falsu britániko, oustraliano, franses, aleman i di Irlandia. Esaki a kousa un guera diplomátiko entre Israel i e paisnan relashoná.
 

But pa Farage, ku a insultá van Rompuy
E oroparlamentario britániko Nigel Farage ta haña un but pasobra el a insultá e presidente di Union Oropeo Herman van Rompuy. Parlamento Oropeo a disidí ku dies dia largu lo e no haña plaka di representashon; ku 2.980 euro, esaki ta e but mas haltu ku tin. Farage a yama van Rompuy, ku ta èks promé minister di Belgika, un hende ku aparensha di un trahadó di banko, ku karisma di un feila muhá. E presidente di Parlamento Oropeo a pidi Farage pa pidi despensa, ma el a ninga esaki.
 

Pronóstiko di wer
Awe meinta solo ta bria. Atardi lo bini mas nubia ma awa lo no kai. Temperatura di merdia, mas o menos 7 grado. Mayan i djabièrnè tin basta solo i lo ta mas o menos 6 grado. Den wikènt tin chèns riba yobida di sneu i eis.