Boletin di notisia, 20 di aprel, 13:00 or

Poko poko avionnan ta kuminsa bula atrobe
Rònt di mitar di nuebe ayeranochi, pa promé be den kuater dia, avion a sali for di Schiphol atrobe. Tres avion a subi ku destinashon Shanghai, New York i Dubai. Mayoria di hende ku tabata pegá na Schiphol, kera bai un di e destinashonnan aki. Ademas buelonan ku rumbo pa Hulanda tambe a kuminsá bula, entre otro for di Sürnam i Korsou. Awe KLM lo bula mitar di su buelonan oropeo. Transavia i Martinair tambe lo bula atrobe. E ministernan di tráfiko di 27 pais di Union Oropeo a disidí pa limitá e prohibishon pa bula den Oropa na algun zona. Lo parti e espasio aereo riba Oropa den un asina yamá zona di 'no-go', un zona sigur i un zona kaminda avionnan mester paga tinu. E direkshon di tráfiko aereo Eurocontrol ta establesé e zonanan.
 

Polítiko konosí so na prome dies luga riba konsepto di lista di PvdA
Riba e konsepto di e lista di kandidato di PvdA tin hende konosí so riba e promé dies luganan. Despues di e kabes di lista Job Cohen ta sigui èks sekretario di estado Albayrak, èks minister Plasterk i presidente di frakshon Hamer. Ademas den e tòp dies tin presidente di parlamento Verbeet, e èks sekretarionan di estado Dijksma, Klijnsma i Timmermans i e parlamentarionan aktual Dijsselblom i Samsom. E miembro di rat di Amsterdam Marcouch, èks presidente di deelraad Amsterdam Slotervaart tambe a drenta haltu riba lista. Èks minister Van der Laan no ta subi lista. E ta kandidato pa bira burgemeester di Amsterdam. E konsepto di e lista di PvdA pa elekshonnan di 9 di yüni lo keda presentá ofishalmente awe mèrdia.

Venezuela ta selebra 200 aña di independensia
Ku un parada militar grandi na Caracas a kuminsá e selebrashonnan di 200 aña di eksistensha di Venezuela. Presidente Chavez a pone un krans riba tumba di Simon Bolívar, e forsa tras di e lucha pa independensia di Venezuela kontra Spañonan. Chavez a bisa ku awe Venezuela ta mas mihó pará ku nunka, i ku e pais lo no ta kolonia di niun hende nunka mas. Agrupashonnan di oposishon a bini ku un bos kontrali, nan ta bisa ku Chavez, ku su maneho a alehá e diferente agrupashonnan di pueblo for di otro, i a instigá nan pa ta kontra otro, i ku den futuro e kredibilidat di demokrasia venezolano lo kore riesgo. Durante di e selebrashonnan lo tin diferente hende prominente presente for di e regio. Asina e presidentenan di Argentina, Bolivia, Nicaragua, República Dominicana i Cuba lo ta na Caracas.

Iglesia Katóliko Cubano ta kritiká rezjim komunista
E kabes di iglesia katóliko na Cuba a duna krítika pisá riba e mandatarionan komunista. Den un entrevista ku e revista Palabra Nuevo kardinal Jaime Ortega a bisa ku for di komienso di e siglo aki nunka situashon na Cuba no tabata dje malu asina. Ortega a pidi e mandatarionan pa liberá e mas o menos 200 prezo polítiko ku aktualmente ta detené. El a ekspresá su tristesa ku morto na februari di e prezo disidente Orlando Zapata, despues di un welga di hamber. Tambe e kardinal a kritiká e echo ku outoridatnan ta molestiá i stroba e agrupashon di derecho humano Damanan na Blanku. Ortega ke pa Cuba traha riba drechamentu ku relashonnan ku Estados Unidos, i riba reformashonnan ekonómiko. Último tempu kos ta bai un poko miho, tambe pa motibu di e bishita di Papa Pablo Segundo na aña 1998.

Oposishon na Haiti ke pa vota kontra lèi di rekonstrukshon
Oposishon na Haiti ta resistí un lèi di emergensia ku mester regla rekonstrukshon despues di e temblor di yanüari. Segun un koperashon grandi di tur e partidonan di oposishon e lèi ta pone soberanidat di Haiti na peliger pasobra e ta pone e ayudo den man di strañero. Ademas esnan kontra, tin miedu ku presidente René Preval lo malusa su poder. Siman pasá parlamento a aseptá e lèi. Lo prolongá e situashon di emergensia na Haiti ku un aña i mei mas, i un komishon internashonal lo kuminsá ku e rekonstrukshon. E komishon ta bou di mando di e promé minister di Haiti Jean Max Bellerive i e èks presidente merikano Bill Clinton. E lider di oposishon Judy Roy ta yama pueblo pa rebeldiá kontra di e lèi.

Wes na Brazil a para konstrukshon di dam Belo Monte
Un wes lokal na Brazil por lo pronto a pará findishi di konstrukshon di e dam kontroversial di Belo Monte den e area di Amazona. E dam gigante aki mester duna miones di Brazileño koriente pero e ta dañino pa selva. E plan pa e dam ta desenas di aña bieu kaba i e protesta kontra e dam ta internashonal. Tambe hende famoso manera e direktor di e sine Avatar, James Cameron, ta sostené e protesta. Siman pasá e mesun wes a prohibí findishi di e dam kaba, pero un wes mas haltu a anulá e sentensia.

Dos lider di Al-qaeda morto na Iran
Trupanan di gobièrnu na Irak a mata dos lider di Al-qaeda. Asina promé minister Nuri al-Maliki a anunsiá. Ehérsito merikano ta konfirmá nan morto. Ta trata di Abu Ayyub al-Masri i Abu Omar al-Baghdadi. A mata nan den nort di Irak durante un akshon di unidatnan speshal, ku sosten di militar merikano. A basha bala riba e kas ku Masri i Baghdadi tabata 'den. Outoridatnan na Irak dos be kaba a deklará Masri morto. Segun Maliki investigashon di DNA ta konfirmá ku en berdat ta trata di e dos hòmbernan.

Pronóstiko di wer na Hulanda
Prome tin hopi nubia ku awaseru den nort. Awe merdia tur kaminda ta seku i solo lo bin bria. Lo bira 8 grado riba Wadden i 15 grado den suit. Mayan tin nubia i lo ta seku. Temperaturanan máksimo lo ta di 8 pa 11 grado. E dianan siguiente lo no tin masha kambio.