Boletin di notisia 12 or di mèrdia

Sakeonan pisá ta kontinuá na Chile
Apesar dje empeño di ehèrsito chileno sakeonan ta sigui tuma lugá na e siudat Concepción i ta bira dia pa dia mas fuerte. Partinan dje siudat ta manera un kampo di bataya, segun testigunan. Segun e alkalde e sakeonan ta mas i mas organisá. No ta hòrta solamente produktonan alimentisio i aparatonan doméstiko. Ya siudadanonan a atraká un kazèrne di brantwer buskando awa i gasolin. E kantidat di morto dje temblor di djasabra ta entretantu shete shen 23. Segun espektativa e kantidat aki ta sigui subi.

Diplomátikonan hulandes na kaminda pa Chile pa yuda lokalisá Hulandesnan pèrdí
E kantidat di hulandes ku no a tende nada mas di dje for di despues dje temblor na Chile a subi te 83. Ta trata di 35 hulandes ku ta biba na Chile i 48 turista hulandes. Hulanda ta manda un tim di ayudo konsulario pa Chile pa asistí representantenan diplomátiko hulandes na e pais. Aparte dje embahada hulandes na Santiago tin tambe ocho otro konsulado na otro siudatnan. Pa haña un bon bista dje situashon di Hulandesnan na Chile embahada hulandes ta pidi tur Hulandes na Chile pa mèldu nan mes.

Konfeshon Joran van der Sloot ta inkreibel
Ministerio Públiko na Aruba ta bisa ku e delaster konfeshon di Joran van der Sloot ta inkreibel. Djadumingu e emisora RTL 5 a pasa un entrevista den kua Van der Sloot ta konta dje destino di Natalee Holloway. Natalee lo a kai for di balkon bou di influensha di bebida i kokaina. Despues Van der Sloot i un amigu lo a laga e kurpa sin bida den un muras. Pero Ministerio Públiko na Aruba a haña e filmashon resien akí for di ougùstùs aña pasá. Un tim di ekspertonan rubiano i hulandes a investigá e grabashon detayadamente. Konklushon ta ku loke Van der Sloot ta konta ta klòp pa loke ta trata e tempu, pero e elementunan dje konfeshon no ta digno di krédito.

Reprochenan pisá den arena polítiko
Lidernan polítiko ta reprochá otro pisá, pa loke ta trata e temanan di seguridat i integrashon. Esaki a sosodé durante un debate den e programa di televishon Een Vandaag. Lider di SP Agnes Kant ta yama Geert Wilders di PVV, un menasa mas grandi ainda pa komunidat, ku islam. Wilders no ta buska solushon, pero ke duna otronan kupla, asina Kant ta bisa. Lider di PvdA Wouter Bos, ta haña ku ta bai muchu leu pa bisa ku Wilders mes ta un menasa, pero e ta yama su ideanan deskabeyá. Wilders ta bisa, ku e ofisina prinsipal di PvdA ta situá na Mekka, si Bos no ta kere ku marokanonan kriminal, ta daña Hulanda.

Notifikashonnan di abusu seksual ta oumentá
Wikènt ku a pasa a drenta diesseis notifikashon di abusu seksual denter di misa katóliko. E notifikashonnan a drenta serka e komishon Ayudo i Keho, ku obispunan a instituí diessinku aña pasá, pa duna ayudo na víktimanan di abusu seksual, kometé pa pastornan i padernan. E kantidat di keho di wikènt ku a pasa, ta kasi mes tantu, ku e kantidat di kehonan ku e komishon sa haña normal, denter di ún aña di tempu. Motibu pa e oumentu ta divulgashon di Wereldomroep i e korant NRC, tokante abusu seksual na e internat katóliko 's Heerenberg. PvdA i VVD ke pa bin un investigashon independiente dje abusu seksual den misanan katóliko.

Zalm tin mag di keda na kabes di ABN Amro
Minister demisionario De Jager ke pa èks minister Gerrit Zalm keda komo direktor na ABN Amro. E ta sigui konklushon dje profesor Michiel Scheltema. Scheltema a investigá e ròl di Zalm den e kaso di bankarota dje banko DSB. Banko Sentral di Hulanda a opiná positivo riba e ròl di Zalm den un rapòrt. I Scheltema a disidí pa sigui e opinion akí. Pero e outoridat ku ta hasi kontrol finansiero, Autoriteit Financiele Markten, ta bisa den un otro rapòrt ku Gerrit Zalm no a prestá bon. Parlamentu hulandes ta dividí relashoná ku e rapòrt di Scheltema.

Oumentu di represhon na Kuba despues di morto di Zapata
Na Kuba ta parse ku represhon a oumentá for di despues dje morto di prizonero polítiko Orlando Zapata Tamayo. El a muri un siman pasá, despues di un wèlga di hamber ku a dura 85 dia. Zapata tabata shete aña kaba den prizòn. Su wèlga di hamber tabata komo un protesta kontra dje sirkumstanshanan den prizòn. Siman pasá a arestá hopi simpatisante di Zapata ku kier a rendi un delaster honor na Zapata. Outoridatnan a sera nan pa un tempu kòrtiku. Entre e arestantenan tabatin tambe e blogger konosí internashonalmente Yoani Sánchez. A arest'é ora ku e kier a firma e registro di kondolensha. Entre tantu el a sali liber. Si el a anunsiá pa medio di Twitter ku e no ta haña un visa pa e biahe planeá pa eksterior.

Hòmber ku arma detené na Schiphol
Awe na Schiphol a detené un hòmber di trinta aña, ku tabatin un pistol kargá, huntu kuné. Tambe a arestá dos hòmber di 24 i 26 aña ku tabata huntu ku e hòmber ku pistol. Nan tabata kana den e área di pakus na Schiphol. Segun polis nan tabata kana poko sospechoso. A sigui nan ku kámara di seguridat i tambe un tim di observashon speshal. Ora mareshosé na sivil a kontrolá e hòmbernan nan a haña e arma. E hòmber ku tabatin e arma ta será ainda. A laga e dos otro hòmbernan bai.

Pronótistiko di tempu na Hulanda
Awe mainta solo ta bria. Parti mèrdia tin chèns riba kaida di awaseru. Temperatura ta mas o ménos 7 grado i bientu ta for di wèst i ta moderá.