Mayoria aeropuerto na Oropa ta keda será
Kasi tur aeropuerto na Oropa ta keda awe tambe, será. Ounke ku algun pais ta disidí awe mas lat, si lo kontinuá ku e tráfiko aéreo, ya ta klaro ku henter djasabra aeropuertonan ta keda será. Algun pais lo tuma un desishon mayan mainta. Kontroladónan di tráfiko aéreo oropeo ta bisa ku ainda nan no ta wak un mehorashon dje situashon. E volkan na Islandia ainda ta skupi toneladanan di shinishi den aire. E nubia ta subi te asta un distansha di ocho kilometer den aire. Geólogonan na diferente pais ta bisa ku e situashon lo por dura largu. No ta mashá klaro kiko esaki lo nifiká pa aviashon. Si ta bisa kaba ku por papia dje estorbo di tráfiko aéreo mas grandi for di despues ku a sera e espasio aéreo di Estados Unidos, despues dje atentadonan terorista dia 11 di sèptember 2001. Te ku awor embahadanan hulandes no a haña mashá notifikashon di Hulandes pegá den eksterior pa motibu dje tráfiko aéreo desorganisá. Segun ministerio di Asuntunan di Eksterior na Den Haag si ta asina, ku mas hende ta mèldu nan mes. No ta konosí ainda kuantu Hulandes ta pegá na aeropuertonan estranhero.

Kuater militar spañó a pèrdè nan bida
Kuater militar spañó a pèrdé nan bida, durante un aksidente di helikòpter na Haiti. E helikòpter a kai durante mal tempu den un djùngel yen seru. E militarnan ku a fayesé ta forma parti di un grupo militar di 450 persona. Nan tabata yuda e rekonstrukshon di Haiti, despues dje temblor pisá na yanüari.

Toyota ta bolbe yama outo bèk
Toyota ta bolbe yama bèk shen miles di outo pa reparashon. Ta trata di kasi nuebe shen mil outo dje modèl Sienna na Estados Unidos i Kanada. E fabrikante di outo hapones ta bisa ku e kabel ku mester wanta e tayer di reserva na su lugá ta afektá pa salu ku a stroi den wenter. Si e kabel kibra e tayer ta kai riba kaminda i por surgi situashonnan serio. Toyoto por haña na Estados Unidos un but di 16 mion doler, paso e kompania a informá outoridatnan muchu lat dje riesgonan di seguridat.

Denunsia di froude serka Goldman Sachs
A denunsiá e banko di negoshi merikano Goldman Sachs pa motibu di froude. Tambe tin denunsia kontra un di su gerentenan haltu. Segun e outoridatnan di bolsa merikano e banko renombrá a wanta informashon atras, na momentu di benta di un produkto di invershon ku ta konektá ku hipotek. E denunsia kontra Goldman Sachs a okashoná konmoshon riba bolsa di New York. Akshon dje banko di negoshi a sak ku mas di 10 porshentu.

Vandalistanan a shushá e estatuá di Kristu na Rio de Janeiro
Vandalistanan a shushá e estatua grandi di Kristu na Rio de Janeiro. E vandalistanan a spùit grafiti riba e kabes, brasanan i pechu dje estatua di 40 meter. Nan a subi e stengelnan rònt dje estatua, speshal pa e trabounan di mantenshon. Resientemente a para bishita na e estatua di Kristu el Salvador pa motibu dje koridanan di lodo na e siudat konsekuensha di kaida di awaseru pisá.

Islandia ta haña plaka di IMF
Fondo Monetario Internashonal a aprobá un fiansa di 160 mion di dòler pa Islandia. Ta parti di un fiansa di un total di dos miar di doler. IMF a disidí fin di 2008 kaba pa fia e plaka na Islandia ku ta den un krísis finansiero pisá. Pero pa basta tempu Hulanda i Gran Bretaña a wanta e fiansa. E dos paisnan akí ku ta den direktiva di IMF, a kompensá spardónan perhudiká dje banko Icesave ku a bati bankarota. Nan ke pa Islandia paga e miaresnan di euro's ei, bèk. E negosashonnan di pago bèk ku ta durando lunanan kaba no ta tras di lomba. Pero Hulanda a bisa ku e ke duna Islandia benefisio di duda.

CDA ke amplia kantidat di sentral nuklear
CDA ke amplia e kantidat di sentral nuklear na Hulanda, di un pa tres. E partido ke duna pèrmitnan di konstrukshon pa e sentralnan èkstra, durante e periodo di gabinete benidero, asina minister demisionario Verhagen a bisa durante su bishita na e reaktor nuklear na Petten. Segun Verhagen e sentralnan èkstra ta nesesario, si Hulanda ke ta sigur ku e tin energia aki trinta aña. E úniko sentral nuklear ku Hulanda tin awor ta na Borssele. Tambe VVD, Partij voor de Vrijheid i Trots op Nederland ke amplia e kantidat di sentral nuklear. E otro partidonan den Tweede Kamer ta kontra.

Desunsia kontra abusu seksual na Sri Lanka pa pader hulandes
Obispu Ad van Luyn di Rotterdam a hasi denunsia di un posibel kaso di abusu seksual na Sri Lanka pa un pader hulandes. Obispado di Rotterdam a pone e pastor inmediatamente riba non aktif pendiente e investigashon. E obispado a hasi e denunsia despues di preguntanan di Wereldomroep i NRC Handelsblad. E pader tabata bishitá Sri Lanka regularmente i segun tin papiá pa vakansi di sèks.

Pronóstiko di tempu na Hulanda
Mainta a habri ku poko mest, pero awor solo ta bria na abudansha. Temperatura mákismo ta 16 grado. Mayan djadumingu ta mas nublá.