Boletin di notisia, 14 di aprel 13:00 or

Michelle Obama a bishitá Haiti, i awor ta na Mehiko
Kasá di presidente di Merka, Michelle Obama a kuminsá na un bishita di algun dia na Mehiko.E promé dama merikano durante su biahe lo duna atenshon espesialmente na edukashon i desaroyo ekonómiko. E ta pasa entre otro na un universidat i un skol básiko, tambe e lo topa presidente mehikano Felipe Calderon i su esposa. Promé ku e biahe pa Mehiko Michelle Obama a paga un bishita ònferwagt na Haiti, e pais ku na yanüari a sufri di un temblor pisá.

Latifundista brasileõ kondená na trinta aña den sèl
Un latifundista brasileño a keda kondená na trinta aña den sèl pa asesinato riba e sùr i aktivista medio ambiental merikano Dorothy Stang. Na aña 2007 a kondená Vitalmiro Bastos de Moura na e mesun kastigu kaba, ma un aña despues a eksoner'é. A kanselá e eksonerashon atrobe. Na febrüari di aña 2005 a tira Dorothy Stang mata di un distansha seka. Den e area di Amazona e tabata hiba kampaña pa derechonan di kampesino pober i konservashon di selva tropikal.

Baron di droga arestá na Ecuador
Na Ecuador a arestá un baron di droga notorio. Ramón Quintero Sanclemente ta un di e sinku kriminalnan di mas buská di Colombia. E estado merikano Florida tambe ke persigui'é pa trafikashon di droga i labamentu di plaka. Quintero ta lider di e kartel yamá Norte del Valle ku banda di Colombia ta aktivo tambe na Ecuador, Venezuela i Panama. Ademas e guèn di Quintero ta mantené lasonan fuerte ku kartelnan na Mehiko.

Seka un temblor na China a kai sentenares di morto i tin miles di hende heridá
Nort west di China a sufri di un temblor pisá, kaminda a kai sigur 300 morto i tin miles di hende herida. Segun e promé notisianan hopi edifisio a basha 'den. Nan tin miedu ku ainda tin hopi hende derá bou di e ruinanana. E temblor ku un forsa di 6.9 riba eskala di Richter a originá na un profundidat di10 kilometer. E episentro tabata den provinsia west yamá Qinghai, serka di frontera ku Tibet. E area tin tiki hende ta biba aden, pero e edifisionan ta basta wabi.

Parlamento a keda sorpresá pa e proposishon di promé minister Balkenende pa un korte hustisial nuklear na Den Haag
Parlamento a keda sorpresá pa e idea di prome minister Jan Peter Balkenende pa un korte penal nuklear internashonal. El a bini ku esaki na e kumbre tokante seguridat di material nuklear na Washington. Mayoria di e frakshonnan no ta rechasá e proposishon, pero nan ta duda ku un tribunal speshal ta nesesario. PvdA ta haña ku mester trata kasonan penal nuklear na korte penal internashonal na Den Haag. Pero CDA ta mustra ku Merka, Rusia i China no ta rekonosé e korte aki.. VVD ta duda utilidat di un tribunal apart i SP ta bisa ku nan no ta komprondé nada di Balkenende. Miho e sòru pa e armanan nuklear na e base aereo Volkel sali for di Hulanda, segun SP

Femke Halsema a gana premio Thorbecke
E lider di Groen Links Femke Halsema a gana e premio Thorbecke, un kondekorashon pa elokuensha polítiko. Segun hurado, Halsema ta demonstrá ku den tempu di 'hype' i superfisialidat ta posibel pa debatá ku kontenido, na un manera ku públiko por sigui bon. Tambe a elogia su kapasidat pa skucha i su 'timing' skèrpi. Ta duna e premio Thorbecke kada dos òf tres aña na un representante di pueblo. Hurado ta husga kandidatonan riba retórika, presentashon i estilo di debatá. Ganadonan anterior tabata entre otro Frits Bolkestein i Hans van Mierlo.

Kader Abdolah eskritor di regalo di siman di buki
E eskritor Kader Abdolah lo skibi e regalo di siman di buki di aña 2011. E eskritor, ku ta bini originalmente di Iran, ya pa algun aña ta un di e eskritornan miho lesá di Hulanda. Abdolah a alkansá e públiko lesadó grandi na aña 2005 ku e buki 'Het huis van de moskee', e kas di e moské.

Minister di Finansa ke pone frena riba fiansa hipotekario muchu haltu
Minister demishonario Jan Kees de Jager di Finansa ke baha mas pisá riba banko ku ta duna hende un fiansa hipotekario muchu haltu. E ta pensa riba but mas haltu i mantenshon mas konsekuente di e norma. Ademas e ta investigá si e reglanan mester bira mas skèrpi. Segun e kódigo di kondukta bankonan no ta duna hende un fiansa hipotekario mas haltu ku 4.8 be nan entrada anual. Pero tin be por desviá di esaki. De Jager ta rekonosé ku por ehèmpel hende hoben ku ta kumpra kas pa promé be tin be tin mester di un tiki mas sen. Pero e minister demishonario ta haña ku aktualmente ta desvia di e norma muchu frekuente. Segun un investigashon di AFM, Outoridat di Merkadonan Finansiero, den pasado no ta banko DSB so sino otro banko tambe a duna fiansa muchu haltu.

Èks komisario di DSB ta konfiabel
Nederlandse Bank i Autoriteit Financiele markten ta uni den e manera ku nan ta husga e eks komisario di DSB Robin Linschoten. Nan ta positivo pa loke ta su konfiabilidat,. Aktualmente Linschoten ta komisario seka e kompania di seguro médiko Menzis i si ta na Nederlandse Bank i AFM, e por keda einan. Asina mister demishonario de Jager a bisa parlamento. De Jager su predesesor Bos a pidi e supervisornan pa husga e èks mandatarionan di DSB ku ainda ta traha den sektor finansiero. Seka e èks mandatorio di DSB, Gerrit Zalm, ku aktualmente ta den kumbre di ABN Amro, nan wisio tabata kontradiktorio, Nederlandse bank ta konsideré OK, pero AFM nò.

Pronóstiko di wer na Hulanda
Solo ta bria i merdia tin algun nubia. Lo bira 10 grado riba Wadeen te 16 grado den interior. Tin poko bientu for di nort ost. e dianan binidero lo tin tiki kambio