Boletin di notisia, 13 di mart, 12:00 or

Cohen favorito den sondeo komo futuro promé minister
Job Cohen a kita repentinamente komo alkalde di Amsterdam i a postulá su mes komo kandidato pa liderato di PvdA. Ta konsiderá Cohen komo esun ku lo sigui Wouter Bos. Ayera Bos a anunsiá ònferwagt ku e ta bandoná polítika, pasobra e ke dediká mas tempu na su famia. Cohen ta yama su despedida for di Amsterdam un sakrifisio grandi i a pidi despensa ku el a laga kai direpente asina. El a bisa ku for di su hubentut e ta envolví den PvdA. Cohen ta bisa ku ta lástima ku Bos ta bai, pero e ta respetá su desishon. "Bos a sirbi PvdA ku fervor", segun Cohen. Pa mas ku 50 % di e Hulandesnan entrevistá, ta Job Cohen ta e favorito pa bira promé minister, asina a sali for di sondeonan di e programa di televishon Een Vandaag i di Maurice de Hond. Balkenende ta sali riba 17 % i Wilders riba 15 %.
 

Djaweps ta dera Hans van Mierlo
Djaweps lo dera Hans van Mierlo na Amsterdam den un seremonia privá. Asina lider di D66, Alexander Pechtold a bisa den e programa di televishon Pauw en Witteman. Un siman despues e partido lo organisá un enkuentro konmemorativo speshal pa e difuntu èks lider, ku a lanta e partido. Dia 23 òf 24 di mart lo tuma despedida di van Mierlo den De Rode Hoed na Amsterdam. Por lo ménosr 2000 hende a firma e buki di kondolensha riba énternèt. Den Pauw en Witteman Job Cohen a pidi despensa ku e i Wouter Bos no a komemorá fayesementu di Hans van Mierlo durante nan konferensha di prensa.
 

Agresividat den bùs regional ta oumentá
Provinsianan i kompanianan di transporte públiko regional no ta hasi kasi nada kontra agresividat den bùs. Asina a sali for di un investigashon di NOS. Un añ'i mei pasá minister Ter Horst a laga un taskforce bini ku solushonnan pa e problema ku tabata kresiendo. Esaki a sosodé pasobra tabatin agreshon kontra shòfùr di bùs na Gouda. Den otro siudat tambe a menasá shòfùr. Di e 12 provinsianan ta Limburg i Utrecht so a tuma medida èkstra. Na Groningen i Drenthe e problema a bira asta pió komo ku un di e kompanianan nobo di transporte públiko no tin ni sikiera vigilansha di kámara den su bùsnan. E provinsianan, ku ta responsabel pa servisio di bùs regional, ta bisa ku no tin plaka pa medida adishonal. I nan ta haña ku seguridat den bùs ta responsabilidat di polis i di Hustisia.
 

Demanda pa Benno L. na Den Bosch
Ta akusá Benno L., un instruktor di natashon na den Bosch di tres atento di violashon di mucha muhé ku e tabata duna lès di landa. Ademas, riba e dagfar definitivo ku a sali ayera kontra e instruktor tin pará: 29 violashon, 40 kaso di fornikashon, poseshon di pornografia di mucha i sakamentu di potrèt di mucha muhé sin nan sa òf duna pèrmit. Algun mayor ta haña ku fiskal mester a demandá Benno L. ku mas rigor.
 

Geuzenpenning pa Betty Bigombe
Awe e mediadó ugandes di pas, Betty Bigombe ta risibí e asina yamá Geuzenpenning na Vlaardingen. E èks minister ta risibí e kondekorashon pa su esfuersonan pa terminá guera sivil na Uganda. Den añanan '90 Bigombe tabata un di e pokonan ku tabata negoshá personalmente ku insurgentenan di e 'Ehérsito di resistensha di Señor', e ehérsito di rebelde di Joseph Kony. Ku e Geuzenpenning ta honra luchadó pa libertat i aktivista pa derecho humano. Fundashon Geuzenverzet 1940 - 1945 aña pasá a otorgá e kondekorashon na e organisashon di derecho humano palestino Al-Haq i e organisashon di Israel B'Tselem. E polítiko kolombiano Ingrid Bethancourt i Fundashon Anne Frank tambe a yega di risibí Geuzenpenning.
 

Retiro di ámtenar na Kolombia ta preokupá Hulanda
Hulanda ta preokupá ku retiro di 2800 funshonario di ministerio públiko na Kolombia. Espesialmente retiro seka unidatnan di derecho humano, di investigashon di labamentu di plaka i pa derecho i pas ta preokupá embahada ulandes na Bogotá. Hulanda ta koperá hopi ku e unidatnan aki pa medio di entre otro treinen pa e ámtenarnan envolví. Embahador Marian Kappeyne van de Coppello ta bisa ku koperashon ku ministerio públiko di Kolombia tabatin hopi efekto positivo. Komo ehèmpel e ta duna e hayasgo resien di kokaina ku a trafiká den un karga di rosa pa Hulanda. Trahadónan di ministerio públiko ku a kontribuí pa resolvé esaki, awo a keda sin trabou, asina e embahador ta bisa.

Presidente brasileño ke bira mediadó na Medio Oriente
E presidente brasileño Lula da Silva ta mira un ròl importante p'e komo mediadó na Medio Oriente. E ta bisa ku un hende neutral mester papia berdat ku Israelínan, Palestinonan i tur hende ku tin di aber ku e konfliktonan den e region. For di djaluna Lula ta hasi un bishita na Medio Oriente. Lo e papia ku e representantenan di mas haltu di Israel i Palestina.
 

Guus Hiddink no ta bira bondscoach mas pa Kosta di Marfil
Guus Hiddink lo no bira bondscoach, o sea entrenadó prinsipal di Kosta di Marfil (Wèstáfrika) mas pa Kampionato Mundial di futbòl, kontrali na e notisianan anteri. E no ta bai Suráfrika mas tampoko ku un otro pais. Asina e treiner a bisa den su kolumna den De Telegraaf i den un entrevista ku AD Sportwereld. E siman akí a menta Hiddink komo coach interino di Kosta di Marfil komo ku ta te despues di Kampeonato Mundial e por a dal bai komo bondscoach di Turkia. Pero e treiner ke prepará su mes kompletamente pa su funshon nobo. 'Turkia tin plan grandi i mi ta prepará mi mes mas mihó posibel', Hiddink a bisa.
 

Mas notisia di futbòl
FC Twente a bai bon den kampeonato. E klup di Enschede a gana na kas kontra ADO Den Haag. E ekipo a marka tres gol kontra un di su kontrinkante. Awo Twente a pasa PSV ku 5 punto i Ajax ku 9. Djadumingu tin e wega di Ajax kontra PSV.
 

Pronóstiko di wer
Promé solo ta bria un tiki, ma despues wer ta sera i lokalmente tin finfin di áwaseru. Lo bira 7 grado. Mayan tambe wer ta será i debésenkuando awa ta kai.