Boletin di notisia, 13 di aprel, 13:00 or
 

Kartelnan di droga mehikano ta uni forsa
Tres kartel di droga grandi a uni forsa den e lucha kontra un di kuater guèn. Asina outoridatnan antidroga mehikano i merikano a bisa. Nan tin miedu di un eksploshon di violensha. E kartelnan notorio La Familia, Golf i Sinaloa a kohe teima ku e grupo Zetas. E guèn ei antes tabata traha pa e kartel Golf pero awor lo a haña muchu hopi poder. E lucha ta bai espesialmente pa kòntròl riba kontrabanda di droga den e estado Tamaulipas, ku ta keda na frontera ku Estados Unidos. Mehiko tin aña ta sufri bou di un guera di droga sangriento. E violensha ta kosta miles di hende nan bida kada aña.
 

Gobernador Refunjol di Aruba a keda nombrá pa un di dos término di seis aña
Gobernador Fredis Refunjol di Aruba a keda nombrá pa un di dos término di seis aña. Gabinete na Den Haag awe a hasi e proposishon di sekretario di estado Ank Bijleveld ofishal. Refunjol di 59 aña for di mei di aña 2004 ta gobernado di Aruba. Promé ku esaki e tabata entre otro minister di enseñansa i vise minister presidente di e isla. Su término nobo di seis aña ta kuminsá na luna di mei.
 

Premio Pulitzer pa ProPublica
Na New York e ganadónan di e premionan Pulitzer a bira konosí. E premio merikano ta pa esnan ku a distiguí nan mes den literatura tokante di notisia, arte i letra. E ganadó mas sobresaliente ta e organisashon di notisia online ProPublica, ku a haña e kondekorashon pa un artíkulo tokante kasonan di morto den un sentro médiko i tokante kon a sigui despues di e orkan Katrina. Mayoria di e premionan Pulitzer a bai pa Washington Post. E korant a haña kuater, entre otro pa nan notisianan di Irak i kolumnanan den e korant.The New York Times ku aña pasá a haña sinku Pulitzer, e aña aki a haña tres. The National Enquirer tabata un di e favoritonan pero el a keda sin premio tòg. E revista a manda nan notisianan rònt di e skandal di sèks di e kandidato presidensial John Edwards.
 

Direktiva pa raportá abuzu seksual riba internet di Vatikano
Riba internet Vatikano a pone algun direktiva pa raportá abusu seksual. Asina Vatikano ta bisa ku ora pader abusá di mucha, semper mester entregá nan na hustisia. Obispu semper mester protehá e mucha. E direktivanan ta trahá basá riba reglanan ku for di sinku aña pasá Vatikano a skibi. Awor aki a pone nan riba internèt den un vershon kòrtiku pa ta mas abierto i pa yuda misanan ku ta luchando ku kasonan di abuzu. Ya pa basta tempu Iglesia Katóliko ta hañando mal nòmber pa motibu di kasonan di abusu seksual na Estados Unidos, Irlandia, Alemania i Hulanda.
 

Preokupashon pa final di kopa na Rotterdam
Munisipio di Rotterdam ta hopi preokupá pa e final di kopa entre Feyenoord i Ajax den e stadion De Kuip. Último dianan riba e websitenan pa fèn di Ajax i Feyenoord tabatá hasi yamada pa kousa disturbio. E miembronan di rat di Rotterdam entre otro tin miedo ku esnan ku a kousa e disturbionan na Hoek van Holland i ku a keda kondená, lo bin stroba e final di kopa. Un gran parti di nan a kaba nan sentensia di prizòn kaba i no tin permit di wes pa ta presente na eventonan ku riesgo. E final di kopa di otro siman djadumingu no ta riba e lista di eventonan ku riesgo. Segun munisipio, ku a traha e lista, ora di e sentensia no tabata konosí ku e final por a enserá tantu riesgo asina. Munisipio ke pa alkalde Aboutaleb wak posibilidat pa tene e grupo aki afó.
 

Balkenende ke tribunal nuklear na Den Haag
Prome minister Balkenende ke un tribunal kaminda ta pasa wisio riba estadonan ku ta entregá material nuklear na terorista. Eventualmente por tene e tribunal na Den Haag pasobra e siudat ya kaba ta domisilio di diferente instanshanan di wisio internashonal. Balkenende a proponé esaki riba un kumbre di dos dia tokante siguridat nuklear den e kapital merikano Washington. Tin miedu ku si material nuklear kai den man di organisashonnan terorista, nan por traha arma nuklear di esaki. Riba e kumbre, kaminda mas ku 47 lider di gobièrnu i kabes di estado ta partisipá, Ukraina a kumbiní di distrui henter su stòk di uranio enrikesé den dos aña. China i Estados Unidos a kumbini pa huntu nan pone preshon riba Iran pa stòp ku su programa nuklear.
 

Kabesnan di lista di partido polítiko ta haña protekshon èkstra
Na Hulanda e kordinadó nashonal pa kombatí terorismo ta tumando medida èkstra awor ku e elekshonnan di 9 di yüni ta aserkando. Lidernan di lista Cohen, Halsema, Rutte i Pechtold durante nan presentashonnan públiko ta keda akompaña pa trahadónan di seguridat. Esakinan no ta kana banda di e polítiko konstantemente, manera seka promé minister Balkenende i e lider di PVV Geert Wilders, pero nan ta bisto si. Ademas NCTB, e organisashon pa kombatí terorismo, a hür dos kompania di seguridat pa avisá gobièrnu tokante medida ku nan mester tuma durante enkuentronan públiko. E kordinadó nashonal pa kombatí terorismo, Erik Akerboom, siman pasá a bisa ku e ta tene kuenta ku iregularidatnan na kaminda pa elekshon. Komo ku e opinionnan polítiko tokante Islam na Hulanda ta asina partí, un debate tokante di esaki por sali for di man. Segun Akerboom aktualmente no tin indikashon konkreto pa peliger.
 

Ganadó di songfestival di aña 1959 Teddy Scholten a fayesé
E ganado hulandes anterior di songfestival oropeo Teddy Scholten a fayesé na edat di 83 aña. Dia 11 di mart di aña 1959 el a gana e songfestival di Orovishon na Cannes ku e kantika 'Een beetje', esta 'Un Tiki'. Scholten tabata graba disko huntu ku su kasá Henk, entre nan hopi kantika pa mucha. Na añanan '50 i '60 el a traha programa di televishon manera e show di Snip en Snap, e programa musikal Zaterdagavondakkoorden i Kiekeboe, un programa ku kámara skondí. Na añanan 1965 i 1966 Scholten a presentá songfestival nashonal.
 

Pronóstiko di wer
Solo ta bria regularmente. Temperatura di merdia lo ta di 10 grado riba Wadden te ku 14 grado den interior.