Boletin di notisia di 12or di mèrdia

Wouter Bos ta bandoná polítika
Lider di PvdA, Wouter Bos, ta tuma despedida di polítika.  E no ta elegibel den elekshon benidero i no ta disponibel tampoko pa otro funshon den polítika. Durante un konferensia di prensa, Bos a bisa ku e tin otro responsabilidat manera ta tata di 3 yu. El a bisa ku for di 2007, e ta evaluando pa stòp ku polítika. For di e tempu ei e ta kòmbersá ku Job Cohen, ku ta alkalde na Amsterdam, tokante un remplasante. Cohen ta pone su mes disponibel i ta bai duna un konferensia di prensa awe mèrdia. Bos a enfatisá ku direktiva di partido tin ku disidi ahinda, si Cohen ta bira kabes di lista di PvdA.

Hans van Mierlo, fundadó di partido D-66 a fayesé
Hans van Mierlo, fundadó di partido D-66, a fayese. E tabata malu basta tempu kaba. Van Mierlo ku a nase na provinsia Brabant, a funda partido D-66 huntu ku algun kompañero na 1966. Ku e partido nan kier a brinda un alternativa den polítika hulandes. Na 1967 el a drenta parlamento ku 7 asiento. Hans van Mierlo tabata minister durante gabinete Van Agt na 1981. Su logro di mas grandi tabata e prome gobièrnu sin CDA. Van Mierlo a tuma despedida di polítika na 1998, a nombr'é minister di estado. Novémber pasá, el a kasa ku eskritora Connie Palmen. Hans van Mierlo a bai sosegá na edat di 78 aña.

Minister Eurlings ta tuma despedida di polítika 
Minister Camiel Eurlings ta bandoná polítika. Despues di elekshon na yüni e no ta bini bèk den parlamento komo miembro di CDA. E no ke drenta gobièrnu mas tampoko. Eurlings a partisipá esaki na lider polítiko Balkenende i presidente di partido Van Heeswijk. Hopi a mira Camiel Eurlings komo susesor di Balkenende pero Eurlings ke mas tempu pa su famia. El a drenta polítika tempu e ta'tin 20 aña. Prome komo miembro di konseho di munisipio di Valkenburg, despues komo miembro di parlamento ulandes i parlamento oropeo. For di 2007 e ta minister di Tráfiko i Komunikashon.

Parlamento ulandes ta sigui trata leinan di konsenso.
Parlamento Ulandes a traha un lista di mas ku 300 tópiko ku gabinete demishonario no tin mag di trata. E komishonnan di parlamento ta'tin un lista kaba ku tópikonan kontroversial pues poko a kambia. Un kambio importante ta ku tòg ta bai dialogá pa trata na baha konsumo i abusu di alkohòl bou di hóbennan. Parlamento a disidi tambe ku ta sigui trata leinan di konseshon pa asina prevení retraso dje proseso di reformashon estatal di Reino.

Emily de Jongh-Elhage kontentu ku desishon di Parlamento ulandes
Promé minister di Antia, Emily de Jongh-Elhage, ta kontentu ku desishon di Parlamento Ulandes pa sigui trata e diferente legislashonnan nobo pa desmantelá Antia, maske ku e gabinete aktual ta demishonario. De Jongh-Elhage a felisitá pueblo antiano ku e desishon di Parlamento Ulandes. Esaki ta nifiká ku ta sigui ku e proseso pa desmantelá Antia Ulandes riba 10 di oktober 2010.

Ta kumpra Joint Strike Fighter, si òf nò?
Ta parse ku gastunan di e avion Joint Strike Fighter ta bira mas ku 100 mion dolar. Esaki ta dòbel mas tantu di e montante ku a presupuestá na 2001. Ta spera ku e susesor di F-16 ta keda kla na 2016, loke ta mas lat ku a plania Hulanda ta partisipá na e proyekto JSF huntu ku 7 otro pais. Parlamento a deklara kompra di un otro JSF kontroversial. Esaki ta nifiká ku gabinete nobo tin ku disidi si ta kumpra of nò.

Atrobe temblor na Chile
Chile a keda asotá ku 5 temblor mas. Esun di mas fuerte tabata 7,2 riba skal di Rigter. E episentro tabata dilanti di kosta di e regio sentral yamá Libertador O'Higgins. E regio ta keda 140 km sùit di siudat Valparaíso. No ta konosí ahinda si tin viktima. E siudat Rancagua ku no ta keda masha leu di e episentro, a sufri hopi daño. Marina chileno a duna alarma di tsunami pero despues a revok'é. E temblor a surgi nèt promé ku a huramentá Sebastian Piñera komo presidente nobo di Chile.

Korte di Brazil ta pone Air France paga sèn
Korte na Brazil ta pone Air France paga mas ku 1 mion dolar komo daño i perhuisio. Tin ku paga e montante na famia di viktima di aksidente ku airbus aña pasá. Un airbus di Airfrance a kai den laman 31 di mei 2009. E avion tabata bulando rumbo pa Paris for di Rio di Janeiro. Tur pasaharo, 228, a pèrdè nan bida. Resto di e avion i e kaha pretu ta den laman ahinda, aproksimadamente 4 km den fondo di oséano atlántiko. Esaki ta e motibu ku no por saka afo konbin e avion a kai. Mas famia a hiba e kompania Airbus i otro kompanianan di piesa di avion dilanti na Merka.

Barack Obama ta parti sèn
Presidente merikano Barack Obama a reparti e sèn ku el a haña komo ganadó di presio Nobèl di pas. Obama a bisa aña pasa kaba ku lo e parti e suma di 1 mion euro entre instansianan di bon kousa. Mas ku 180.000 euro ta bai pa un fundashon ku ta sòru pa famianan haña un dak riba nan kabes. Ta trata di famianan di militar den hòspital. E fundashon ku ta rekoudá fondo pa Haiti ta haña 150.000 euro. Eks presidentenan Bush i Clinton a lanta e fundashon aki. Sobra instansianan ku tambe ta haña sèn ta esnan ku ta traha pa stimulá enseñansa bou di estranheronan na Merka.

Wer na Hulanda:
Awaseru ta na kaminda. Awe mèrdia e ta kai tur kaminda. Temperatura ta 6 grado. Wer ta keda asina'ki te ku djaluna; despues ta bira seku.