Boletin di notisia di 12or di mèrdia

Rekonteo di voto na Rotterdam
Rotterdam a start di nobo ku konteo di voto ku elektorado a depositá na okashon di elekshon di konseho munisipal di siman pasá. Den un sala grandi di deporte ta kontando e 221.000 karchinan di voto di nobo i ta kontrolá nan tambe. Públiko por sigui e proseso, entre otro pa medio di webcam. Munisipio di Rotterdam ta spera di por kaba ku e rekonteo awe mes, pa determiná e resultado definitivo mañan. Segun e resultado elektoral original ta partido PvdA a sali ganadó, ounke pèrtá, siguí pa Leefbaar Rotterdam. E diferensha entre e dosnan tabata 600 voto so. A disidí pa konta e votonan di nobo despues ku mas i mas istoria di iregularidat a drenta relashoná ku elekshon pa konseho munisipal na Rotterdam. Parse ku tabatin hende ku a vota mas ku ún biá, miéntras ku na algun urna tabata nan vota pareu den hòki. Ademas di esei Ministerio Públiko lo investigá e asuntu di atkisishon di outorisashon, mió konosí komo 'volmacht', di parti di Leefbaar Rotterdam. Un miembro di konseho munisipal a skibi den un email, ku el a manda pa aspirant-miembro di konseho, ku el a logra haña 50 siudadano di konfiansa na Rotterdam pa vota ku 'volmacht'. Konseho Elektoral ta husga, ku e akshon di partido Leefbaar Rotterdam ta en pugna ku e manera ku ta supos di vota ku outorisashon o sea 'volmacht' .

Antia ta abolí kastigu di morto
Antia ulandes a disidí di abolí kastigu di morto, asina Pedro Atacho, presidente di Staten a partisipá. E ta husga ku pena di morto tabata un asina yamá 'dode letter' na Antia, ya ku en realidat no a ehekut'é nunka. Awor ku lo desmantelá Antia en konekshon ku kambio estatal, gobièrnu ke adoptá un punto di bista di prinsipio pa abolishon di pena di morto.   

Mas orkan e aña akí
Meteorólogonan ta tene kuenta ku un temporada di orkan mas turbulento ku e promedio nòrmal. Nan ta basa nan mes entre otro riba un temperatura mas haltu di awa di laman den Oséano Atlántiko. Un nivel mas haltu di umedat di hairu tambe ta determiná e pronóstiko. Ambos fenómeno ta ofresé un base di nutrishon pa tormenta tropikal. E instituto meteorologiko AccuWeather.com ta premirá 16 pa 18 tormenta tropikal p'e temporada di orkan ku ta kuminsá na yüni. E kantidat promedio di un temporada ta 11 tormenta. Ekspektativa ta ku e aña akí shete orkan lo asotá paisnan alrededor di Golfo di Méhiko, kisas ku konsekuenshanan serio. Teritorionan merikanu na kosta mester tene kuenta ku sinku orkan.

Jan des Bouvries ta den libertat atrobe
Hustisia ulandes a laga Jan des Bouvries bai atrobe. Prinsipio di e siman akí a detené e diseñadó di interior pasó supuestamente e ta involukrá den un kaso di froude fiskal. A duna Des Bouvrie pèrmit pa bai kas despues di algun interogashon.
E diseñadó di interior di entre otro kas, hotèl i ofisina lo ta kómplise di un komersiante di propiedat inmóbil di Utrecht den un froude fiskal enorme. Ku yudansa di faktura falsifiká di Des Bouvrie, e komersiante di biénes rais a logra estafá Servisio di Belásten ku un suma enorme. A gara e komersiante i su direktor finansiero kaba un ten pasá. Ainda nan ta será. Des Bouvries a diseñá interior di un hotèl di luho na Kòrsou.

Carlos Slim ta e persona mas riku na mundu
E komersiante mehikano Carlos Slim ta e persona mas riku na mundu. Esaki ta resultá for di e relato anual di Forbes, un revista pa hende di nogoshi. E 'mediatycoon' a pusha Bill gates di Microsoft un banda riba lista di esnan mas riku na mundu. Slim ta pará awor na puesto number un ku'n kapital ku ta lora den kareda di 54 miar di dòler, ku ta mei miar mas ku esun di Gates. Na di tres lugá a pone Warren Buffet, e invershonista merikanu, ku'n kapital di 47 miar di dòler. Forbes ta bisa ku e kantidat di bionario a oumentá ku 300 i awor e ta mas ku 1.100. Huntu e personanan akí ta karga un kapital di 3.600 miar di dòler.

Notisia di Deporte
Guus Hiddink lo bira entrenador prinsipal di e pais wèstafrikano, Kosta di Marfil (Côte d'Ivoire, Ivoorkust) na okashon di Kampionato Mundial di futbòl na Suráfrika. Ta kontratá Hiddink pa e periodo di 15 di mei te ku 15 di yüli, pero denter di dies dia e tin ku prueba ku a anulá e kòntrat eksistente ku selekshon futbolísitiko ruso. Den pasado e entrenador hulandes a yega di ta aktivo komo entrenadó, o sea 'bondscoach' di Hulanda, Sur Korea i Oustralia na Kampionatonan Mundial. Na luna di ougùstùs Hiddink lo dal bai komo entrenadó prinsipal di Turkia. E pais akí no a klasifiká pa Kampionato Mundial di Futbòl na Suráfrika.

Pronóstiko di tempu
Dia a habri nublá na Hulanda, bientu ta leve te moderá i ta bin di direkshon nortost. Awetardi tin poko solo sí, temperatura promedio ta 6 grado riba sero. Próksimo dianan ta bai ta nublá i áwaseru lo kai, pero temperatura lo subi gradualmente, loke ta koïnsidí ku primavera meteorológiko.