Boletin di notisia 13.00 or

Polítikonan antiano i arubano presente den Tweede Kamer
Promé minister di Antia Emily de Jongh-Elhage ta di bishita na Hulanda. Motibu pa esaki ta tratamentu di e leinan den Tweede Kamer ku mester regla kambionan di struktura estatal. Kuminsamentu di siman delegashonnan di polítikonan for di Staten di Antia, konsehonan insular di Kòrsou i St. Maarten i di Staten di Aruba a biaha kaba pa Den Haag pa nan tambe asisiti na e debatenan. Un mayoria di polítikonan antiano ke pa Tweede Kamer aproba e leinan di konseso. Esakinan a keda aproba kaba na Antia i n'e diferente islanan. Si parlamentu hulandes tambe bai di akuerdo, e renobashon estatal di Antia por sigui riba e fecha planiá 10 di òktober 2010.

Ronnie Brunswijk lat ku entrega di lista di elekshon
Na Sürnam partido di Ronnie Brunswijk i dos otro partido no tin mag di partisipa na elekshonnan den algun destrito grandi na mei. E aliansa di e tres partidonan A-Combinatie a entregá su lista muchu lat na entre entro Paramaribo i Wanica. Presidente Ronald Venetiaan a pidi algun sentro elektoral pa keda habrí un tiki mas. Esaki a okashoná disgusto seka entre otro partido di oposishon NDP di èks lider di ehersito Desi Bouterse. E último akí a bisa ku e hefe di estado no mester mete su mes ku un proseso elektoral independiente.

Spaña ta ekstraditá pilóto hulandes Julio Poch
Gobièrnu spaño a aprobá ekstradishon di e pilóto hulandes-argentino Julio Poch. Lo persigui Poch na Argentina pa krímennan kometí durante e régimen di Videla. Na yanüari un wes spaño a bai diakuerdo kaba ku e ekstradishon. Ta sospecha Poch di a ehekuta asina yamá buelonan di morto fin di añanan setenta, kuminsamentu di añanan ochenta na nòmber junta militar argentino. Durante e buelonan di morto tabata tira oponentenan di e régimen militar for di avion den laman.

Hulanda por yuda Rio de Janeiro
Hulanda por yuda Rio de Janeiro ku su perisia riba tereno di maneho di awa, esaki segun Jan van Overeem di e ofisina di ingeniero Arcadis. E di dos suidat mas grandi di Brazil a konfronta inundashonnan pisá último dianan. Na yanüari Hulanda a ofrese ayudo kaba na Sao Paulo, un otro suidat di mjiones di habitante ku tambe a hañé konfronta ku inundashonnan pisá. Segun Overeem na Rio nan mester traha prinsipalmente riba un miho sistema pa pronostika inundashonnan i tambe pa evita esakinan. E indundashonnan na Rio i suidatnan den serkania entre tantu a gosta bida 180 persona. 14 mil persona mester a hui for di nan kas.

Èks wes Guzmán ta defendé Gárzon
E èks wes chileno Juan Guzmán, internashonalmente konosi pa e manera ku el a persiguí èks diktador Pinochet, ta defende e wes spaño Baltazar Gárzon. Den entrevista ku Wereldomroep Guzmán ta bisa ku ta sospechá su kolega spaño inhustamente di a hasi abuzu di su funshon. Garzón mester defendé su mes dilanti wes na Spaña pa su investigashon tokante desaparisashon di 114.000 oponente di e régimen di e diktador spaño Francisco Franco. Garzón lo a aktua robes pasobra for di 1977 a drenta un lei di amnestia na vigor tokante krímennan kometé durante dje gera sivil spaño di 1936 pa 1039.

Cordaid ta yuda traha kas na Haïti
E organisashon hulandes pa ayudo di emergensha Cordaid Mensen in Nood a kuminsa konstruí kas i edifisionan na Haïti. Den e pueblesito Papette na kosta di Haïti nan a traha sinku kas. E kantidat akí mester subi próksimo lunanan te dos mil. Di e manera akí Cordaid ke yuda haitianonan ku a pèrdè nan kas durante e teremoto na yanüari. E kasnan ta masha simpel konstruí. Nan ta di palu i nan dak ta di zink. E habitantenan mes tambe ta yuda traha nan kas. Kompanianan lokal di karpinteria tambe ta kontribuí na konstrukshon di e kasnan.

Padernan salesiano no por traha por lo pronto
E padernan hulandes di e orden salesiano di Don Bosco, akusá di abuzu seksual, mester stòp imediatamente ku tur nan trabou pa e kongresashon. Esaki te ora e investigashon tokante abuzo seksual den iglesia Katóliko Romano termina. Asina Herman Spronck, pader superior di salesianonan hulandes a disidí. Ta promé be, despues ku e diferente kasonan di abuzo seksual a sali na kla, ku un kongresashon na Hulanda ta tuma medida kontra klérigonan. For di investigashon di Wereldomroep i e korant NRC Handelsblad a resulta ku tres èks pader i bruder, akusá di abuzu sekshual o ku a asta atmití esaki, ahinda ta aktivo den trabou pa hobennan o ta okupa funshonnan di direktiva.

Pasport kaduká tambe ta válido
Durante elekshonnan pa parlamentu hulandes dia 9 di yüni próksimo votadónan por vota tambe ku e un tarheta di identifikashon kaduká. Esaki no mas ku sinku aña si. Di e manera akí gabinete ta spera di por fasilitá prinsipalmente hende grandinan pa nan por bai vota. Durante elekshon pa konseho munispal na mart tin hende no por a vota pasobra nan no tabatin un tarheta di identifikashon válido. Esaki a sosode prinsipalmente ku hende grandi ku no ta aktivo o ku no tin idea mas di bai biaha. Pero si hulandesnan ku ta biba den eksterior i ku tin un tarheta di identidat ku a kaduká tambe por bai vota no ta kla ahinda. E ofisina di elekshon na Den Haag no ke bisa nada na e momentunan akí riba e asuntu'ki.

Presidente di Polonia a fayese den aksidente
Presidente Kaczynski di Polonia a muri awe mainta den un aksidente aereo. E avion di Kaczynski a kai durante aterizahe na e suidat ruso Smolensk. Tur 132 persona abordo a pèrdè nan bida. E kasa di Kaczynski tambe a muri i otro funshonarionan di gobièrnu polako ku tabata abordo. Awe Kaczynski lo a asistí na e konmemorashon di 22 mil prizonero di gera ku e servisio di inteligensha di Union Soviétiko a asesina na 1941. E avion di Kaczynski, un Toepolev 154, a kai den mest, un kilometer i mei promé ku e pista di aterizahe.

Pronóstiko di tempu
Hulanda tin awe hopi solo pero ta un tiki frieu si. Aki aya tin asta mest. Pero hinter dia ta keda seku si. E temperatura lo subi te ku 13 grado. Mayan no tin masha kambio, solamentu lo ta mas nublá.