Boletin di Notisia di 12or di mèrdia

Toke di keda na Chile despues di temblor
Outoridatnan chileno a dekretá toke di keda pa Concepción, e siudat ku e temblor devastador a asotá djasabra último. Despues di e sismo a sakia nogoshi na gran eskala. Intenshon dje prohibishon pa sali ta pa restablesé órden públiko. Esun ku subi kaya entre nueb'or djanochi i seis or di meinta ta riska aresto polisial.
E sifra di morto despues dje temblor i e tsunami na Chile a yega 700 i piku. Mayoria víktima a kai na pueblesitonan kostal n'e region di Maule. Gobièrnu chileno a rekonosé sí ku mester a transmití notisia di menasa di tsunami mas mió n'e poblashon.
Ayera djadumingu trahadónan di reskate a saka por lo ménos 25 hende bibu for di restunan djun kompleho di apartamentu di 14 piso. A bin haña seis kurpa sin bida tambe den e edifisio. Ta sigui buska, ya ku ainda tin desénas di hende derá bou dje flèt k'a basha'bou.
Gobièrnu di Chile ke kuminsá rápidamente ku distribushon di alimento i remedi. Awa i kuminda ta skars na e pais. Hopi nogoshi chileno a bira inaksesibel pa motibu dje temblor potente di djasabra último. Te awor 40 Hulandes a disparsé na Chile.

Ocho morto den inundashonnan na Haiti
Na Haiti a kai por lo ménos ocho morto debí na inundashonnan k'a surgi despues djun pal'i áwaseru. E hendenan a peresé n'e parti zùitwèst dje pais despues ku awa a lastra nan bai kune. Algun testigu okular a bisa ku teritorionan kompleto ta bou di awa i ku hende a subi dak di nan kas en espera di yudansa. Mester a desokupá un prizòn ku 400 detenido. Pashènt i personal djun hòspital mester a hui pa motibu di inundashon. E sitio di kalamidat ta keda na 150 i piku kilometer di kapital Port-au-Prince, kaminda tin hopi asistente i reskatista internashonal ainda en konekshon k'e temblor di 12 di yanüari último.

Tormenta na Wèst-Oropa
Wèst Oropa ta rekuperando, despues di e tormenta pisá Xynthia di wikènt ku a pasa. Por lo ménos 55 persona a pèrdè nan bida i na hopi lugá e desaster tabata enorme. E tormenta a asotá sobretodo Fransha. Aya 47 persona a pèrdè nan bida. Ainda desénas di hende ta pèrdí. Outoridatnan ta papia di un katástrofe nashonal. Mayoria víktima a kai na kosta wèst pa motibu di inundashon. Ainda sentenáres di miles di Franses ta sin koriente. Awe presidente Sarkozy ta bishitá e áreanan mas perhudiká.
E tormenta Xynthia a eskihí bida na otro paisnan tambe, manera  Alemania, Spaña, Portugal i Bélgika. Na Hulanda tabatin mas bien daño material na provinsianan Limburg i Noord-Brabant. Aya a kai 60 erido.

Abusu seksual na internat a spanta obispu Van Luyn
E skandal di abusu seksual na un internat di padernan salesiano na s'Heerenberg a shòk obispu Ad van Luyn di Rotterdam. Monseñor van Luyn ke pa investigá e kaso mas aleu. Na añanan 60 i 70 a abusá di por lo ménos tres i kisas mas alumno n'e internat ku ta pertenesé n'e kombento Don Rua di órden salesiano na s'Heerenberg, provinsha Gelderland. E kos akí a sali na kla despues ku Wereldomroep i NRC Handelsblad a indagá e asuntu. Na añanan setenta obispu van Luyn tabata superior di órden di padernan Salesiano di Don Bosco na Hulanda. El a buta e asuntu riba agènda pa trat'é den e konferensha obispal di 9 di mart próksimo. Jan Kees de Jager, e mandatario demishonario konserní a partisipá e notisia akí. Próksimamente De Jager di Finansa lo kòmbersá ku e ministernan eksperto i puntra nan kon nán ta kere di por kaba ku défisiti riba nan tereno. Prinsipio di kada añ' gabinete ta wak si gastu i entrada di gobièrnu ta surpasá presupuesto òf nò. De Jager ta haña ku un gabinete demishonario tambe ta supos di hiba deliberashon presupuestario ku e ministernan eksperto.

Obama a prolongá lei di terorismo na último ora
Na último ora presidente Barack Obama a prolongá e lei anti-terorismo merikanu ku ún aña mas. Si el a keda sin firma, e lei akí lo a kaduká djadumingu. E lei anti-terorismo, mió konosí komo Patriot Act, ta outorisá gobièrnu pa tuma sierto medidanan pa evitá aktonan terorista den sosiedat merikanu. E lei ta pèrmití gobièrnu por ehèmpel pa vigilá siudadanonan i tap kòmbersashonnan telefóniko den kuadro di seguridat nashonal. Eks presidente George W. Bush a implement'é despues dje atentadonan di 11 di sèptèmber 2001.

Défisit di dos miar di euro pa gabinete demishonario
E aña akí gabinete ulandes demishonario ta enfrentá un défisit di dos miar i piku di euro.
Jan Kees de Jager, e mandatario demishonario konserní a partisipá e notisia akí. Próksimamente De Jager di Finansa lo kòmbersá ku e ministernan eksperto i puntra nan kon nán ta kere di por kaba ku défisit den nan departamento. Prinsipio di kada aña gabinete ta wak si gastu i entrada di gobièrnu ta surpasá presupuesto si òf nò. De Jager ta haña ku un gabinete demishonario tambe ta supos di hiba deliberashon presupuestario ku ministernan tékniko.

Deporte-Weganan Olímpiko na Vancouver
Na Vancouver, Kánada a klousurá Weganan Olímpiko di wenter k'un espektákulo impreshonante. E seremonia a start ku'n desfile di deportista. Skatsdó Sven Kramer a karga bandera hulandes. Despues a tene vários diskurso i por a skucha himno di e paisnan partisipante. Alkalde di Vancouver a pasa bandera olímpiko pa su kolega ruso. Na 2014 lo tene Weganan Olímpiko di wenter na Sotsji, Rusia. Chef de mission ulandes Henk Gemser a yama Vancouver 2010 'e weganan ku momentonan memorabel'. Hulanda a klousurá Vancouver 2010 ku kuater medaya di oro, un di plata i un di bròns.

Pronóstiko di tempu
Awe ta variablemente nublá, awa por yobe tambe pero den kurso di dia wer lo habri gradualmente sí. Bientu ta moderá te fuerte i ta bin di wèst. Temperatura ta mas o ménos 7 grado riba sero. Mañan ta seku, solo lo bria un tiki. Temperatura máksimo ta 8 grado. E dianan binidero lo keda seku pero frialdat lo bolbe. Lo vris levemente den oranan di mardugá.