Ed Gumbs tabata e djasabra akí den e rúbrika 'Den Spòtlait', di e radioprograma na papiamentu di Radio Nederland Wereldomroep 'Aki na Hulanda'. Gumbs, polítiko antiano pa PvdA na Dronten, ta aktualmente entre otro presidente dje Plataforma di polítikonan di desendensia antiano i arubano na Hulanda, PPAAA (Platform Politici van Antilliaanse en Arubaanse Afkomst).

Skibí pa Ronald A. Muyden

E parti fuerte di PPAAA ta ku e plataforma ta trese fortifikashon serka polítikonan antiano i arubano ku ta den diferente partido polítiko hulandes. Na e manera akí nan por ta hiba palabra i bira portabos di terenonan ku ta konserni antianonan i arubanonan na Hulanda.
Den pasado Ed Gumbs tabata miembro di Staten provinsial di Flevoland. Gumbs ta sigui tur desaroyonan polítiko djaserka, spehalmente ora esaki tin di aber ku Antia i Aruba.

Derecho di voto
E siman aki a presentá un rapòrt kaminda ta konsehá ku habitante di Antia i Aruba tambe mester haña derecho di vota pa parlamentu hulandes, esta Tweede Kamer. Gumbs ta kompletamente di akuerdo ku e konseho aki. "Leinan ku pasa den parlamentu hulandes por tin afekto riba Kòrsou i Sint Maarten. Esaki no ta e kaso ora pasa lei na Antia pa ku Hulanda", segun Gumbs.

Partisipashon
Ed Gumbs ta di idea ku un persona ku ta pretendé pa algu ser realisá ku e mes tambe mester hasi esaki. Na e manera aki un otro por mira por ehèmpel kiko bo kemen. "Pesei mi ta un persona ku no ta bisa kos so, pero ta hasi esaki tambe!", segun Gumbs.

Gumbs ta haña un lástimamente ku por konkludí ku partisipashon di antiano i arubano den polítika na Hulanda ta tiki. E ta mira poko poko un kambio positivo sí. Su lema ta keda sí: "bo tin ku partisipá pa bo por influensiá".

Klek aki bou i skucha e kòmbersashon kompletu entre Ed Gumbs, Belkis Osepa i Ronald A. Muyden