E basista i kitarista legendario, Julian Coco, a hasi un operashon di urgensia na su pia. Siman pasá, di ripiente e mester a drenta hospital na Utrecht. Julian Coco, ku a studia kitara klásiko na konservatorio komo promé Yu di Kòrsou, a haña bishita di minister plenipotensiario di Kòrsou, Sheldry Osepa.

Osepa a bini ku dos kitarista Doy Salsbach i Ludwig Rondón, pa duna un regalo musikal na señor Coco den hospital. Den kompania di su kasá Leen nan a toka e piesa ‘Juliana’ ku ta un areglo di Julian Coco. Pa alegria di tur hende Julian a kuminsá nùri huntu ku e muzik di kitara.

Sentido di humor
Julian Coco ta sintié bon: “Tur loke mi a logra den mi bida, mi a logra ku sosten di otronan. Hende mester di otro den bida. Tur hende mester di otro”. Ku Cocon no a pèrdè su sentido di humor a bira kla, ora ku el a memorisá ku mester hasi muzik ku estilo i ku pashon.

Otro aña yanüari, ku poder di Dios, señor Coco ta kumpli 87 aña. Minister Plenipotensiario a primintí e pareha kasá di bolbe bishitá nan e dia ei.