Ken no a yega di risibí bishita inesperá na kas? Sin duda kasi tur hende. Lo bo bisa 'bishita ta bishita', sinembargo no ta tur hende ta apresiá ora bati na porta sin anunsiá ni palabrá bishita promé. Reakshon di kada ken por tin di aber ku tradishon, kultura, estilo di bida, pero tambe ku estado di ánimo, manera tenshon, miedu òf mal bèis.

Fuera di eseinan ta mashá nòrmal awendia pa traha trabou di ofisina na kas, sea pa bo mes negoshi òf pa bo dunadó di trabou, asina ta ku si hende blo riba bo, esaki ta interumpí bo skèdjel, pues un bishita inesperá por ta sumamente inkumbiniente.

Kordialmente bonbiní
Tin hende ku sí ta dispuesto di risibí bishita tur ora bai, maske hende rèis riba nan.
Aurita por ehèmpel: e ta un señora di edat avansá, setent'i piku di aña, ounke lo bo no bisa si bo mir'é: nèchi hende, bon kuidá, un negrita balente pero elegante, manera sa bisa den Karibe. E ta biba basta aña na Hulanda. Niun hende no tin mester di yam'é delantá pa bisa ku nan ta na kaminda. P'e tur hende ta bonbiní, sea nan a palabrá pa bin serka dje òf kore yega den purá, es mas: "Ounke ku mi no tin nada den kas, mi ta buska un kos di gòlpi asina ki, traha un kos p'é, asina mi ta trata tur hende."

Meskos ta konta pa Sany, e tampoko no ta maint risibí bishita, Sany tambe ta bibando hopi aña kaba na Hulanda i su profeshon ta 'gastouder' o sea mayor anfitrion: e ta traha pa un empresa ku ta organisá kuido di mucha na kas di hende. E ta kuida un grupo di mucha diariamente na su kas, pues hende por akudí serka dje libremente: "E trabou ku ami ta traha no ta nada partikular pasó ta ku mucha chikí mi ta traha." Ademas di esei ta nòrmal pa risibí bishita ki ora ku ta, 'ta algu di mi kultura.'

Aktitut di reserva
Enkambio pa hendenan manera Ronaldo, batimentu na porta di bishita inesperá ta kue nan sí di sorpresa, sobretodo si ta trata di hende straño. Ronaldo tin su mes empresa, e ta traha duru pues ora e ta liber, e ke bai trankil. E ta splika ku su aktitut reservá ora di bishita inesperá tin di aber mas bien ku su karakter, pero tambe si ta un persona ku no sa frekuentá su kas mashá. Si famia mester blo ta menos problemátiko p'e.

Bishita di ladron
Sin duda e tipo di bishita inesperá mas fastioso ta ladronisia i atrako. Esaki hende no ta deseá ni pa su pió enemigu.

E sorto di bishita aki sa okashoná amargura, trouma i deskonfiansa pa restu di bida. Jennifer ta diseñadó di wèpsait di kompanianan mundialmente renombrá. E sa traha na ofisina òf na kas, dependé di e magnitut di su enkargo. Poko tempu pasá Jennifer a risibí bishita indeseá di ladron na su kas. Ainda e kos ta traha riba dje. E no ta drumi bon, 'kada zonido ku mi tende, mi ta spanta, pasó bo ta keda ku miedu sí.' Ta di komprondé, pasó si un hende straño drenta bo kas pa hòrta bo kosnan frankamente ta di kompará ku abuzu i violashon, en todo kaso di bo privasidat i di bo trankilidat. Pero e ta rekomendá pa no laga miedu apoderá dibo, sino bo no ta hasi nada mas.

Felismente e kontrario dje evento hororoso aki ta e konosido bishita di sorpresa: imaginábo bo sali trabou bai kas, anto pa bo gran sorpresa henter famia ta sintá ta wardábo yega, pa selebrá bo aña: 'Surprise!' Un atenshon asina ta dushi tòg.

Kon kore ku hende
Ekspertonan den e materia akí ta bisa ku por tuma sierto medida pa kore ku bishita inesperá:
- Bisa amigu i konosínan ku bo no ta apresiá bishita inesperá i ku bo ta preferá di traha sita delantá. No ta tur hende por ku un aktitut direkto, pero si berdaderamente nan tin bo na pechu, nan lo tene kuenta ku esei.
- No laga e bishita drenta. Want'é na porta anto bisa ku mió e pasa un otr'un biá. Esei lo siña nan di á e siguiente biá.
- Hasi manera ta na punto di sali bo ta òf ta kos di hasi bo tin.
- Si bo ta drumí, keda ketu ketu pa nan kere ku no tin hende na kas.

Pero di tur manera semper lo keda hende ku ta gusta risibí bishita tur ora bai, sin afsprak, sea ku ta na Hulanda òf nò, no ta importá. Pa esnan afligí i ultrahá, pero tambe pa esnan ku djis ke bebe un kòpi kòfi den un ambiente ameno, e tipo di hende hospitalario aki ta un 'pan di Dios'.