Minister Liesbeth Spies di Asuntunan Interno i di Relashonnan di Reino ke siña konosé e islanan di Antia hulandes di ántes. Djaweps 9 di febrüari e mandatario hulandes ta inisiá su bishita di orientashon. E no ke sera konosí ku gobernante so, sino ku pueblo tambe. Sinembargo, esaki no ke men ku lo no papia seriamente ku otro.

Djis promé ku e barka, e minister mester a responsabilisá su maneho na Boneiru, Sint Eustatius i Saba (BES) den Tweede Kamer, o sea parlamentu hulandes. Parlamentu a pèrdè pasenshi ku desaroyo na e munisipionan ekstraordinario. Spies ta haña ku n'e momentu akí e no por hasi mashá kos ku e reklamo ei, ma na su pareser e preguntanan dje parlamentarionan ta positivo sí: "Parlamentu ta mustra di ta altamente envolví ku e preguntanan hasí i e ansiedat ku ta rèina n'e islanan."

Aparte dje puntonan di prekupashon, tin desaroyo positivo tambe ta tumando lugá, segun e minister: "Gobièrnu ta aselerando su maneho. Señor Weekers (sekretario di estado di Finansa-red) ta sumamente okupá riba terenu di derechi di importashon anto señora Van Bijsterveldt (minister di Enseñansa-red) ta invirtiendo formalmente n'e islanan. Entretantu tur hende ta sigurá kontra gast médiko." Spies ta mustra rib'e echo ku ta un añ'i mèi so e struktura nobo ta vigente: "Debésenkuando un tiki poko poko kisas?"

Minister kordinadó
Spies no ta kere ta un bon idea pa nombra un minister kordinadó pa islanan BES, manera hopi parlamentario hulandes a proponé. "Den e kaso ei e problemanan lo dura mas na lugá di menos tempu." Loke ta pasa ta ku e no ta minister di Enseñansa òf di Finansa, asina ta ku henter ora e tin ku posishoná su mes entre Tweede Kamer i e mandatarionan konserní. "Si nan akudí direktamente ayá, ta kita un nivel afó."

E minister hulandes lo laga representante di Reino, Wilbert Stolten inform'é dje situashon pa wak kon kos ta pará. Spies ke sa di Stolten unda e ta mira oportunidat pa mehorashon. "E ta e promé lokèt p'e hendenan n'e islanan." Ma segun Spies no ta hasiendo sufsiente uzo di esei.

Refineria Aruba
Kontinuashon dje refineria petrolero na Aruba no ta sigur mas. Hulanda ke yuda pa keda kuné, segun e minister. Tin problema relashoná ku presupuesto dje otro paisnan outónomo den Reino, o sea Kòrsou i Sint Maarten. Spies a papia kaba al respekto ku promé minister kurasoleño Gerrit Schotte. "Nos ta sumamente prekupá ku e perspektiva di vários aña." Loke no ta konta dje tantu ei pa Sint Maarten.

E bishita di trabou di Spies ta kuminsá na Aruba. Despues e ta pasa na Kòrsou, Boneiru, Sint Maarten, Saba i Sint Eustatius. Djaweps 16 di februari Spies ta barka na Kòrsou di regreso pa Hulanda.