Ta bai kambia konstitushon pa regla státùs di e islanan Boneiru, Saba i St. Eustatius komo entidatnan públiko di Hulanda. Sekretario di estado enkargá ku asuntunan di Reino, Ank Bijleveld a primintí esaki durante un konsulta legislativo pa lei nobo pa islanan BES.

Gabinete hulandes kier a regla status nobo di islanan BES den statuto so, pero bou di preshon di Parlamento tòg ta start ku un prosedura pa kambio di konstitushon. Esaki ta nesesario pasobra e islanan ta bira parti di Hulanda i pa motibu ku nan ta bai vota pa Senado hulandes. "E ta biba den parlamento i nos ta bai implementá e moshon", Bijleveld ta bisa. Entretantu e proseso di reformashon ta sigui kana.

Komishon di parlamento ku ta enkargá ku asuntunan di Antia i Aruba, a diskutí dos dia largu riba seis di e trinta leinan ku ta trahando pa e entidatnan nobo: Bonaire, Sint Eustatius i Saba. Pronto parlamento ta vota riba e leinan. Segun sekretario di estado Bijleveld, ta superá un opstákulo grandi. "E ora ei nos a tuma e promé paso".

Matrimonio homoseksual
E sekretario di estado ta deskonsehá amienda di lei pa inkorporá matrimonio di homoseksual, aborto i eutanasia. E no ke inkluí kasamentu di personanan di mesun sekso den lei ainda, ya ku no a papia ku gobièrnu insular di e islanan riba e asuntu. "Semper nos ta'tin idea pa deliberá riba e kos akí den un fase posterior. Dunámi tempu pa papia ku e partnernan riba e e tópiko aki ". E mandatario ta enfatisá ku gabinete sigur sigur tin inteshon pa regla matrimonio homoseksual den lei pero den un fase mas avansá. Loke sí mester rekonosé for di awor na Islanan BES ta e matrimonionan di sekso igual, ku a kontraé na Hulanda, asina Bijleveld a agregá. 

Entidat públiko
No ta sigur ainda si islanan BES definitivamente ta keda entidat públiko. Despues di un tempu nan lo por bira munisipio of provinsia di Hulanda. Ank Bijleveld ta di opinion ku e islanan ta muchu chikí pa por bira provinsia di Hulanda. Nan por bira munisipio sí.

Skucha e kombersashon di Leila Wijnhoven ku Scarlet Windster.