Sekretario di estado di Relashonnan di Reino Ank Bijleveld ta haña, ku durante e proseso pa un struktura estatal nobo Hulanda semper tabata un partner di konfiansa. Pa Bijleveld ta lástima ku Bestürskolezje di Boneiru a reakshoná manera el a reakshoná riba e karta tokante posponementu di finansiamentu di sierto proyekto . 'Jammer', asina Bijleveld a bisa den un reakshon pa Radio Nederland Wereldomroep. E sekretario di estado no ta di akuerdo ku e ponensia ku lo e ta mete ku polítika lokal di Boneiru. "Esei sí ta ko'i kèns."

E sekretario di estado ta enfatisá un biaha mas, ku kambio di struktura estatal, ku ta hasi Boneiru un sort'i munisipio di Hulanda, ta un pakete di medida i palabrashon ku no por mishi mas kune. "Gobernantenan di Boneiru no por ta asombrá ku algun proyekto no ta sigui, unabes ku nan a disidí ku nan no ta partisipá na e proseso temporalmente."

Boneiru ta bisa ku no ta trata niun ora so di un otro opshon. E forma ku ta duna kontenido na e statùs nobo so ta tópiko di e referèndem. Segun Bijleveld un otro kontenido di e statùs nobo por bira un kos totalmente diferente na integrashon den Hulanda. "Ta tira e fundamènt afó i mester realisá ku por lo pronto Hulanda lo no invertí."
 

Zeta riba kandela
Bijleveld ta desmentí ku e lo a tira zeta riba kandela ku su karta tokante seramentu di e kranchi di plaka. E ta keda dispuesto na papia ku Boneiru tokante kontenido di e tareanan ku Boneiru mes por hasi. "Boneiru por haña un otro repartishon di tarea kompará ku Saba i Statia. Pero pa hasi esaki bo mester papia ku otro sí i ta Boneiru a stòp e kòmbersashonnan."
 

Bijleveld a duna di konosé ku e lo no kontestá e karta di Bestürskolezje lihé. "Mi ta kere ku ta prudente pa warda un ratu riba kon e desishon tokante e referèndum lo bai." E ta spera sí ku lo reanudá e deliberashonnan promé ku e konsultashon di pueblo tuma lugá, pasobra tempu ta bai: "Mi ta responsabel tambe pa kontinuashon di e proseso estatal di Sint Maarten i Kòrsou."