Sekretario di Estado Ank Bijleveld di Relashonnan den Rèino ta optimista ku progreso di desmantelashon di Antia ulandes. Den su aklarashon athunto na e presupuesto pa 2010 e ta bisa ku den e 'aña di transishon' ei e islanan lo dal e último pasonan den direkshon di nan státùs nobo. (Pa mas detaye mira: Begroting voor 2010 <http://www.rijksbegroting.nl/2010/voorbereiding/begroting?hoofdstuk=40.14>

Boneiru, Sint Eustatius i Saba (Islanan BES) probablemente lo ta práktikamente kla kaba promé ku e fecha meta di 10 di òktober 2010, pa risibí nan státùs di munisipio ekstraordinario di Hulanda, asina Bijleveld ta bisa sin menshoná e fecha ei. Sint Maarten i Kòrsou mester demostrá 'no riba papel so' ku nan ta kumpli ku e kriterionan di un státùs nobo komo pais. "Nan mes ta responsabel pa esaki", asina e mandatario ulandes ta enfatisá un biá mas.

Komienso finansiero sano
E legislashon nesesario pa e kambionan ta kla kaba i parlamento ulandes lo trat'é den kurso di 2010. Fuera di esei a kuminsá ku saneamentu di debe estatal na 2009, moda ku e islanan por tin un komienso finansiero nobo i sano. Cft, e kolegio di supervishon finansiero lo sigui pèrkurá pa e presupuestonan ta na òrdu.

Por lo demas e islanan lo risibí yudansa di Hulanda pa oumentá e 'abilidat di tuma inisiativa lihé' den gobièrnu. Otro puntonan importante den e koperashon pa alkansá e situashon nobo ta mantenshon di lèi i polis.

Aruba
Pa loke ta Aruba e sekretario di estado ta bisa ku e ke kompletá e investigashon di estado di kuenta di gobièrnu na 2010. A base di esei lo husga si mester di medida. Por lo demas gobièrnu arubano mester sigui ku mehorashon di mantenshon di lèi i di e 'kadena di strañero'. Ku esaki ta referí na e National Security Plan, atministrashon sivil i servisio di imigrashon Dimas.
 

Finalmente Bijleveld ta partisipá ku na 2010 lo organisá algun simposio ku tin di aber ku futuro di Rèino.

Skucha sekretario di estado Bijleveld den kòmbersashon ku kolega Scarlet Windster