E aña aki algu mas ku 700 hóben for Aruba, Boneiru, Kòrsou, Sint Maarten i Sint Eustatius a bin studia na Hulanda. E hóbennan aki ta kuminsá un bida kompletamente nobo na un pais straño. Kiko ta e kosnan ku nan ta bai topa den e etapa nobo di nan bida i kon dil ku esakinan? Rasheendra Polonia i Margie Zuloaga Fernandez, dos studiante ehemplar ku tin algun aña kaba na Hulanda, ta konta Donovan Leslie, ku ta kuminsá studia e aña aki, di nan eksperenshanan.

Tantu Rasheendra Polonia di 19 aña komo Margie Zuloaga Fernandez di 20 ta studia medisina i ta biba dos aña kaba na Maastricht. Rasheendra ta konta ku e gusta su estudio i ku semper e tabatin hende (famia) pa yud'é. "Mi tabatin hopi suerte'. Loke el a ripará ta ku tòg tin basta studiante ku tin problema pa haña e direkshon ku nan mes ke.

Margie di su banda ta konsehá pa 'zet door', pa perseverá, pa hasi un esfuerso pa e estudio i pa no laga otro kos influenshá bo karera, manera sinti falta di kas i di bo hendenan, 'bo tin ku para den bo sapatu.'

Pens'é bon
Donovan Leslie di 19 ta di Aruba i e ta nobo na Hulanda. El a bin pa studia i biba na Arnhem. E ta haña e dos damitanan studiante mashá ehemplar. El a bin su so Hulanda, pero e ta haña ku bo mester ta 'madurá sí'. Donovan: 'Ami mes a pens'é hopi bon promé. M'a disidí di bin den e friu na dezèmber, mi mes kier a haña sa dikon hendenan ke bai bèk Aruba'....

Apesar ku Donovan ta studiante nobato, el a prepará su mes debidamente pa e bida di estudio na Hulanda. Den lat el a disidí pa skohe pa studia Communicatie i no pa un Lerarenopleiding. Pues e ta rekomendá pa "skohe e estudio korekto, pasobra bida ta kostoso, komo studiante bo ta bin bo so, e ta kostábo hopi plaka i mama i tata no tei, bo mes tin ku hasi tur kos."

Akogida i bibienda ta esensial
E kos di mas importante pa stabilidat den bo estudio ta akogida i bibienda. Pa Rasheendra no tin un kos mas difísil ku yega un kaminda straño i regla tur kos bo so, sin yudansa di famia i konosí. E ta konsiderá su mes bindishoná: "Mi a haña mi kas mesora." E akogida na Maastricht tambe tabata bon reglá. Pero e sa tambe di hende, ku ta haña kamber pa tanten, pero ku dado momento mester muda bai otro kaminda despues. Esaki ta trese strès pa estudiante, sobretodo si e ta ful okupá ku su estudio. Sa yega asina leu, ku nan no sa mas ki nan hasi...

Donovan ta konta ku su ruman a yud'é ku tur e trámitenan nesesario relashoná ku opvang i kamber, pues e tambe tabatin suerte, sino lo e no a sa un dos tres ki e mester hasi. 'Mi ruman a yudámi di biá, si bo no tin niun hende akinan, bo ta yega Hulanda, bo ta pará na Schiphol...ja, en nu....? Donovan ta imaginá su mes ku hopi mucha lo hansha i drenta pániko ora e kos akí pasa ku nan, ta p'esei e ta haña ku 'opvangcommissie mester tei henter e promé aña, pa yuda stimulá e hóbennan den tur situashon, no e promé simannan so.' Tin un mèntòr wèl, pero esei ta yuda mucha na otro siudatnan tambe, pues 'hopi kos ta bo mes lo tin di hasi', segun Donovan.

Margie tabatin e suerte ku su tata a muda huntu kune, ma e ta rekonosé e situashon ku Rasheendra i Donovan ta deskribí. E sa di un hóben ku ta bayendo bon ku su estudio, pero e tin tres luna ta buskando otro lugá di keda, pasobra su kòntrat aktual a kaduká, pero... kétubai sin resultado. . 'Hopi vervelend pasó e tin smak di sigui studia, e no ke pa un kos asina influenshá su estudio.'

Bai bèk o keda Hulanda
Rasheendra ta haña difísil pa bisa di antemano ku ta bai bèk òf nò. E ta komprondé ku e pais natal mester di hóbennan studiá pa yuda ku su desaroyo, pero é en todo kaso no sa si e lo regresá Kòrsou. Dependé hopi di e situashon n'e momento ei. Un di su opheshonnan ta pago bèk na florin di e 'studiefinanciering', ku e ta risibiendo na euro, 'si mi bai bèk, mi debe ta bira dòbel di loke mi a haña, e idea no ta pa sigui paga pa semper.' Rasheendra ta kere ta mas sensato pa traha algun aña na Hulanda i paga e debe bèk, anto pa despues regresá e islanan.

Donovan ta di e mes opinion ku Rasheendra. E debe di estudio sigur sigur ta un problema, konsiderando ku balor di euro ta dos florin i mei, 'bo tin ku bai paga dos be mas tantu bèk na florin.' Sinembargo e ta husga ku mester tene kuenta ku e fenómeno di brain drain tambe, kaminda esnan  studiá ke keda Hulanda. Loke Aruba a regla pa studiante paga menos bèk, e 'ta haña un bon deal pa stimulá e studantenan pa bin bèk nan pais.'

Bon prepará
Margie ta pone énfasis riba e tempu rekerí pa kaba un estudio, mas aún si ta trata di un rumbo spesialisá: e ta dura seis aña mas e or'ei den kaso di estudio di medisina. E no ta sigur ku e ta bai bèk, pero si e hasié mes, e ta preferá regresá profeshonalmente bon prepará.

Rasheendra, Margie i asta Donovan, ku a kaba di yega, ta rekomendá studiante nobo pa 'prepará bo mes bon, hopi kos lo kambia den bo bida, no give up muchu lihé, na final bo ta mira e fruta di loke bo a hasi i ...siña di e opstákulonan!