"Stòp ku stigmatisashon di hende ku aids, no hink'é den un huki." Un apelashon di Juan Walter di GGD na Amsterdam riba dia Internashonal di SIDA. Segun Walter ta importante pa persona infektá bisa kon e ta dil ku e malesa o infekshon. Tambe ta importante pa kargadó di e viro haña sosten di famia.

E no ke mara su mes na sifra, pero segun Juan Walter e kantidat di Antiano i Arubano ku a kontraé e viro di SIDA na Hulanda a keda práktikamente meskos kompará ku aña pasá. Walter no ke menshoná sifra pa evitá malinterpretashon di nan.

Relashoná ku uso di protekshon kontra e viro di SIDA, Juan Walter ta bisa ku te ahinda, a pesar di tur kampaña di informashon, Antiano i Arubano tin problema ku uso di kondon. "Prinsipalmente ora nan bai afó, por ehèmpel ora nan bai Kòrsou, nan ta lubidá di uz'é. Si nan tin relashon ku un hende di nan mes kultura aki na Hulanda, nan no ta uz'é dje lihé ei tampoko. Pero si nan tin relashon ku un hende di otro kultura sí nan ta uz'é." 
 
Informashon tokante remedi
Awendia un persona ku tin SIDA no tin mester di muri a konsekuensha di e malesa aki. E remedinan ku tin ta pa prolongá bida, pa esaki ta mas agradabel. Segun Walter tin hende ku sa bon di e remedinan akí. Otro no sa mashá di nan. "Di e parti ku sa di e remedinan aki, tin un parti ku ta kere ku hustamente pasó tin un remedi, nan por tuma riesgo. Esaki ta un peliger."
Segun Juan Walter un otro aspekto di prekupashon ta ku tin Antiano i Arubano kontagiá ku e viro di SIDA, ku no ta tuma nan remedi na tempu. Di e manera aki e viro por bira resistente. 'Anto un dado momentu sí dòkter por bisábo ku e no por yudábo mas'.
 
Biba positivo
E aña akí tema di Dia Internashonal di SIDA ta: 'biba positivo'. Walter ta bisa ku pa un persona infektá ta masha importante pa e biba positivo. Pa e por hasi esaki e mester rondoná su mes ku hende, famia i amigu ku ta positivo, ku ta respald'é i sostené. "Kemen no ku hende ku ta stigmatisábo, ku ta butábo den un huki". Ta p'esei e fokes ta mas riba biba positivo e aña akí.

Juan Walter den deklarashon pa sekshon karibense di Wereldomroep