Bestürskolezje di Boneiru a kai djadumingu 19 di sèptèmber. Diputado Anthony Nicolaas a retirá su sosten pa e koalishon di PDB di Jopie Abraham. Segun Nicolaas Abraham no a kumpli ku palabrashon riba tereno estatal i di referèndem.

Na opinion di Anthony Nicolaas no tin niun motibu mas pa sostené bestürskolezje. 'Despues ku Abraham a trese dilanti ku el a firma e deklarashon final ku sentimentu miksto, mi a organisá un reunion ku mi simpatisantenan i nos a disidí di no sostené e gobièrnu mas.' Nicolaas a deklara ku e ta 100% kontra e Statüt nobo di Reino.

Referèndem
Segun Nicolaas e ta kasi yega na un deklarashon di intenshon ku su partido bieu UPB di Ramonsito Booi, partido ku el a laga kai aña pasá ainda. Nicolaas: En todo kaso mi sa kiko mi tin na dje.' Tin un kondishon pisá pa por traha huntu, mester tene un referèndem tòg e aña aki mes. 'Mi ta deliberando kuné pa organisá promé ku fin di aña un referèndem kaminda nos lo puntra pueblo si nan ta pro òf kontra e státùs di identidat públiko di Hulanda.

Anthony Nicolaas ta splika pakiko e no ta sostené koalishon ku PDB mas, un aitem di René Roodheuvel

Ramonsito Booi di UPB a konfirmá ku su partido ta deliberando atrobe ku Nicolaas. No tin masha eskoho, segun Booi. 'Tin hende ku ta trahando pa yega na un deklarashon di intenshon, djei nos ta bai wak tur kos. Ta pa sinku luna so, durante e tempu ei nos ta warda elekshon di mart 2011. No ta al kaso si mi ta konsider'é e aliado adekuá. E ta e úniko eskoho awor. E otro eskoho ta pa laga Hulanda bula aden.'

Booi tokante un posibel koalishon ku Nicolaas, un aitem di René Roodheuvel

Jopie Abraham di PDB ta bisa ku e paso di Nicolaas a bin di sorpresa. E no sa eksaktamente tampoko pakiko Nicolaas a legumai e koperashon, pasó ainda e no a papia kuné. 'No tabatin niun konflikto, no tabatin diferensha di opinion. Te awe Nicolaas no a aserká mi tampoko pa bisámi ta ki ta su motibunan. Mi sa esei pasó gezaghèber a manda mi un meil bisando ku el a haña un karta (di Nicolaas red.) kaminda e ta bisa ku e no tin konfiansa mas den bestürskolezje.'

Aprobashon
Abraham ta nenga ku el a firma e deklarashon final na Den Haag kontra boluntat di Nicolaas. 'Promé ku a firma e deklarashon final a laga Nicolaas wak e, m'a puntré si tabatin opheshon, i e no tabatin. Nicolaas a aprobá mi spich i firmamentu kompletamente.'

Ku e refèrèndem no a sigui ta falta di Nicolaas mes, asina Abraham ta bisa. 'E ta miembro di bestürskolezje. E ta un dje sinku miembronan. E mes a entregá un amienda pa tene e referèndem riba un fecha ku mester kaba di stipulá ainda.'