“For di mi sesenta aña lo mi a biba di mi penshun di Apna i paga mi hipotek ku mi AOV. Pero awó si mi stòp di traha ku sesenta aña, mi ta haña 30 porshento ménos AOV. Por ta mi mester bende mi kas pa biba mas simpel i sin dolo di kabes di plaka.”

Marjorie ta mashá rabia ku su plannan finansiero ta brua ku oumento di edat di AOV, “Mi a kambia di trabou na Gobièrnu pa mi no tin ku lanta meinta mitar di seis pa mi por kore promé ku fila. Mi ke bai biba mas trankil. Mi no tin niun tiki gana di traha sinku aña mas.

Segun e amtenar aki su generashon ‘niun ora so no ta biba asina largu’ manera minister Hensley Koeiman (Desaroyo Sosial, Trabou i Bienestar, MAN) i su atvisornan ke laga hende kere. “Kuantu amigu i konosí mi no a pèrdè ku tabatin 49, 55 òf 60 aña. Ta mas bien e generashon promé ku nos ku ta biba masha largu, ta pishi nan pèmper den kasnan di ansiano.”

Difísil i karu
Arturo (53) sevéramente ta kritiká e kalkulashonnan riba kua e subida di edat di penshun ta basá. “Mi no ta kere ku e kalkulashonnan ku ta konta pa Hulanda ta bálido aki tambe. Nos bida aki ta hopi mas pisá. Ta basta difísil i karu pa biba salú na Kòrsou. Transpòrt públiko, kuido médiko i previshon finansiero na Hulanda ta hopi mas mihó regla. Gobièrnu no mester wak sifra so pero sirkunstanshanan lokal tambe.
Eric tin 61 aña kaba i ainda ta traha den haf. “Mientras tantu mi kurpa ta wanta mi ta sigui traha. Mi no ta kere ku nos hubentut tin e forsa pa traha te 65 aña. Nan no ta biba salu. Nan mester paga tinu na esaki.”

Maritsa ta kai nèt pafó di e fase di transishon. “M’á kaba di hasi 57 dia 18 di yanüari. Ma mi no tin problema pa sigui traha te mi di 65 aña. Si mi salu no ta pèrmití, mi djis stòp mas promé. Mi ta biba mi so i mi ta bin’ kla ku un AOV redusí.”                    

Nashonal
John Jacobs di Kámara di Komèrsio lo tin gana di mira un solushon nashonal pa e problema di AOV. “Aki no ta pas pa mira interes sektoral. Un trahadó mas bieu ta kosta mas pa motibu di su ekspertisio. Pero ku e trahado mas bieu ei bo tin un relashon di konfiansa i esei bal hopi.”

“Di tur manera edat no ta un motibu pa kita un hende for di trabou – pero kiko e hende 60 plùs mes ke? P’ami no ta hasi diferensha: sea un hende hoben òf un hende grandi di edat sirbi kòfi, e smak dje kòfi ta keda meskos.