Ku hopi entusiasmo nuebe bario a gaba nan proyektonan durante e promé Marshe di Bario na Kòrsou. E barionan ku ta forma parti di e Plan Nashonal pa desaroyá Bario (PNB) ta spera di haña finansamentu di sektor privá pa mehorá nan bario. E marshe ta e promé kontakto entre e barionan i kompania interesá.

Kada bario a duna splikashon di tres proyekto ku no tin fondo pa nan ainda i ku no ta kai bou di proyekto ku gobièrnu por finansá. Habitantenan, pa medio di promové nan bario, mester haña mas sintimentu di responsabilidat i siña traha pa nan bario.

Tópiko favorito
“Nos mester di hopi, masha hopi mes”, Alonso Frans, representante di Parera, ta bisa. Ela a nase, lanta i biba na Parera. “Mi tin 49 aña ta biba einan. Mi konosé e bario manera mi plant’e man i mi por kontabo na plaka chikí ta kiko tur ta sosodé den nos bario.”

Den kombersashonnan ku finansadónan potenshal su tópiko favorito ta un warda di polis den bario. “Nos mester haña una warda asina, pasobra hopi ladron ta bin skonde den Parera. E mucha hòmbernan ku últimamanete a hui for di GOG tambe.”

Desapuntashon
No opstante tur anunsio den media i propaganda na radio i televishon no tabatin masha bishitante den patio di Universidat di Kòrsou. Un bishitante a bisa: “Promé mi ker a kaba di wak e wega Hulanda – Dinamarka. ”E hendenan di Soto tabata desapunta ku tabatin asina tiki presente di sektor privá. “Un kompania di gobièrnu a pasa, pero mes ora a bisa ku nan no por hasi nada pa nos. Ta solamente an ker a inventarisá e proyektonan. E kompanianan ku spònser potenshal bo por a konta riba dede di un man.”

Representantenan di kompanianan lokal ku sí tabata t’ei, por a kambia sosegá di mesa pa mesa i haña splikashon di e barionan tokante nan proyektonan. Dos representante di Maduro & Curiel’s Bank (MCB) a haña un splikashon amplio di e bario Souax. “En bèrdat nos a keda sinta largu seka Souax” Migdarys Mercera-Martina, ku ta enkargá ku proyektonan sosial na MCB, ta bisa. “Souax tin un proyekto interesante, Mi Stima Souax, algu ku nos no a tende ainda seka otro bario.

MCB ta bisa ku Marshe di Bario ta un bon komienso pa bario haña finasamentu pa mehorá e bario. Mercera-Martina: “Ta lástima ku hopi proyekto ta dirigí na infrastruktura den bario, manera renobashon di sentro di bario òf vèlt di deporte, konstrukshon di lugá kaminda por topa i limpiamentu di e bario. Nos ke fókùs riba proyekto di formashon di habitante di bario. Ta p’esei e proyekto ‘Mi Stima Souax’a apelá masha na nos. E habitantenan di e bario ta siña stima nan bario i nan ta siña koperá na desaroyo di nan propio bario.”