Pasobra no tin investigashon mas di e supuesto práktikanan di froude di John Deuss, First Curaçao International Bank (FCIB) i nan klientenan, awor Banko Sentral di Kòrsou i Sint Maarten (CBCS) mester paga plaka sospechoso na empresa sospechoso di froude, i además mester paga e gastunan sumamente haltu di proseso i abogado.

Na ougùstùs di aña pasá un wes di Kòrsou a obligá CBCS pa den seis luna paga 75 porshento di e plakanan di fris na por lo ménos dos empresa bou di sospecho di labamentu di plaka i froude di BTW na Gran Bretaña. Tur dos ta kompania ku ta pertenesé na e asina yamá grupo di riesgo ku mester vigilá pa motibu di labamentu di plaka. FCIB i su doño aktualmente ta parse dilanti wes na Arnhem, Hulanda, pa froude di BTW na gran eskala na Gran Bretaña.

Embargo
Despues ku 6 di òktober 2006 kreditornan a pone embargo ehekutorial riba saldonan ku FCIB tabata mantené na Banko Sentral, esaki riba 9 di òktober a retirá e pèrmit di banko di FCIB. For di e tempu ei ta CBCS ta enkargá ku outorisashon di direktiva di FCIB.

Banko Sentral tin un prosedura ku ta aplikabel pa kliente di e gruponan di riesgo ku ta regla nan asuntunan bankario seka FCIB. Nan mester duna sierto informashon, entre otro un ‘auditor s report’. Esaki e trahadónan compliance di FCIB ta kontrolá i un partido eksperto eksterno ta analisá. Despues di kompará e investigashon di FCIB ku e auditor’s report Banko Sentral ta disidí tokante pago.

E kompanianan en kestion mas o ménos a entregá e informashon ku a pidi, pero aparentemente investigashon no a tuma lugá. E banko únikamente por duna MOT (notifikashon di transakshon ínusual). Ni hustisia britániko ni servisio di belasting ni hustisia hulandes no a presentá mas den e kasonan aki.

Investigashon
Sinku aña despues wes a haña ku e embargo riba e saldonan di e kompanianan aki a dura basta kaba. Banko Sentral no ta hasi investigashon mas, i tur hende, outoridatnan britániko i hustisia hulandes, a haña oportunidat amplio pa husga e informasho ku a duna, terminá investigashon di froude i demandá plaka di froude. Den un sentensia wes a disidí ku e empresanan en kestion, asta si nan ta sospechoso ainda, mester haña tres kuart di nan plaka bèk. No tur nan plaka, pero esei tin relashon ku e posishon di likidat di FCIB.

CBCS ainda no a apelá e sentensia aki. Awor e mester kumpli kuné bou di pena di un multa di 10 mil florin pa dia, te un máksimo di 10 mion. Atrobe CBCS a logra pone embargo riba fondonan i no a paga ainda.

Mirando e sentensia di wes aki, ta ferwagt ku por lo ménos 100 kompania ku tabata kliente di FCIB por pleita nan kaso kontra CBCS ku éksito.