Mayoria hóben antiano, ku a kita skol na Zoetermeer entretantu a ser kondusí bèk na un òf otro forma di edukashon eskolar, stazje òf trabou. Algun aña pasá munisipio a fokes riba mas o ménos 35 Antiano, ku a bandoná skol prematuramente i awor 90 porshento di nan ta poniendo man na obra atrobe.

Wethouder Edo Haan di Zoetermeer ta satisfecho ku redukshon di e fenómeno di Dropout. “Nobenta porshento di e hóbennan ku nos gara ta regresá skol òf ta duna nan un kos di hasi. Nos ta sigui vigilá nan i via vários kanal nos ta purba pone e hóbennan akí bèk riba e bon kaminda.”

Ban bèk skol
Zoetermeer tin un maneho di dropout ku ta konsistí di tres proyekto: stabilidat thuis, Graag naar School i Weer naar School. (stabilidat na Kas, ban Skol ku smak i ban bèk Skol). “Nos a palabrá ku e departamento, ku mester redusí e kantidat di hóben ku ta kita skol promé ku tempu drástikamente.  A instalá un kolaborador ku bèkgrount antiano. A enkarg'é konkretamente ku kombatimentu di e fenómeno di dropout na skol. Ta studia wak si e hóbennan por regresá skol òf si nos por pone nan traha”, segun Haan.

Un brassband ta trese disiplina
E otro dos proyektonan ta dirigí riba medidanan preventivo kontra kitament'i skol. “A nombra trahadónan sosial antiano na dos skol VMBO. Ademas di esei nos a kuminsá ku un brassband na Zoetermeer. E kos akí a para bira un éksito rotundo, pasobra dado momento tabatin entre sinkuenta i setenta mucha hòmber i mucha muhé aktivo den e band. Esaki tabata ofresé un sierto grado di stabilidat, komo ku kádabe nan mester a presentá na tempu na e ensayonan, algo ku a surti un efekto disiplinario fuerte sí.”

Loke Haan ta kere ta masha importante tambe ta e atenshon pa e situashon na kas. Ta p'esei ta duna kurso pa famia di un mayor so. “Di e forma akí por yuda mamanan ku ta risibí ònderstant na Hulanda. Tambe ta duna kursonan di empowerment pa hóbennan, moda ku nan por papia ku otro i mira pa duna nan balor propio un estímulo positivo.”