Ya ta kuater aña kaba ku e ta sintá na kas sin trabou na Beijum, probinsia Groningen. Pero awor sí el a fada. Curly Tielman ta un dama soltero di 37 aña di edat. E ke bai bèk Kòrsou, ku ta su isla natal. E ta kombensí ku e mester por hañ'un trabou i ku e lo sinti su mes mas felis ayanan, mas serka di su mama i otro famianan. Grasias na mediashon i apoyo di e ofisina di entrenamentu profeshonal i di mediashon yamá 'Sosio na trabou' lo e por regresá na luna di novèmber.

Curly Tielman a bin Hulanda kuater aña pasá p'un vakansi di tres siman.  E tempu ei el a kaba di pèrdè su trabou na krèsh na Kòrsou. Ora ku su ruman hòmber a proponele pa permanesé na Hulanda p'un tempu , el a disidí di keda.  Su ruman a konsehé di busk'un trabou i sigui desaroyá su mes.
 
Pronto a resultá ku no por haña trabou asina fásil.  "Mi a manda buska mi diploma i otro papelnan for di Kòrsou pero na Hulanda no ta rekonosé mi diploma antianu pa krèsh.  E diploma mester ta hulandes pa por traha na krèsh na Hulanda i e ora ei nan a rekomendámi pa bolbe sigui un estudio, pero mi no tabatin gana di bai skol bèk pa siña kosnan ku mi tabata sa kaba ", asina Curly a bisa. Ademas, e no tabatin intenshon di keda hopi tempu na Hulanda.
 
El a konsiderá sí na sigui un formashon di rekapasitashon. Pero ora el a akudí na Sociale Dienst, o sea serbisio sosial ku ta e instansia ku ta dunele su 'uitkering' , o sea pago sosial nan a bisé ku e serbisio no ta yuda paga sierto estudionan. Esaki tabata e kaso ku e formashon pa bira yùfrou di skol preparatorio ku Curly tabatin na bista.  Logá a resultá ku e estudio tabata muchu karu i nan a bisé ku tin sufisiente yùfrou di lushiklas kaba. Curly Tielman a sigui lèsnan di idioma hulandes sí durante un añ' í mèi pa mehorá su hulandes poko.
 
Kansá di sinta na kas
Despues di a sinta kuater aña na kas pòrnada ku de bes en kuando pida kos di hasi riba terenu di trabou boluntario, e kos a kuminsá fastidiá Curly.  E ta hari i ta konta ku no t'un bida, esta, sinta na kas wak telebishon i ku e kos ei ta hasi hende bieu.  E no tabatin famia mas na Hulanda i poko-poko ta resultá ku su mama mester di yudansa na Kòrsou. Sufisiente motibu pues pa Curly kuminsá pensa riba su regreso.  "A yega tempu pa bai bèk", asina Curly a bisa.  I si tur kos bai bon e lo sosodé na novèmber.
 
Via via el a drenta den kontakto ku 'Sosio na trabou'. Ta un empresa na Groningen spesialisá den treineng i mediashon laboral pa hendenan ku no por haña trabou fásilmente.  Ya ta un aña i mei ku 'Sosio na trabou' ta yuda hendenan ku ke regresá Antias o Aruba.  E empresa ta intermediá ku buskamentu di trabou pa via di su sosionan ku tin ofisinanan na e islanan. No ta trata solamente di buska un djòp pa e kandidato-remigrante. Ta studia e sirkunstansianan sosial bon tambe kaminda e lo ingresá. Si un remigrante ke bai biba bèk serka su famia lo wak promé si esaki por. Ta te ora imbestigá tur kos promé i si informá e kandidato-remigrante bon i e ta bon prepará pa su regreso anto e ora ei numa 'Sosio na trabou' ta duna lus bèrdè.
 
"Pasku dushi na Kòrsou"
Curly Tielman ta konsiderá futuro na Kòrsou komo muchu mas prometedor.  "Mi mester por logra ku mi famia band'i mi.  Mi konosé Kòrsou kaba tòg. Konkubaibin Hulanda no por ofresémi un futuro". Esaki ta konvikshon di Curly.
 
René Durenkamp di 'Sosio na trabou' a informele en ekstenso tokante e situashon na Kòrsou despues di su ousensia di kuater aña. E sa presis kiko e por spera riba terenu di trabou, pero tambe por ehèmpel pa loke ta bibienda.  Por lo pronto lo e no tin mester di prekupá. Curly lo bai biba bèk serka su mama. "Awor sí mama mester di mi yudansa".   E ta optimista tambe pa loke ta trabou. E por regresá na krèsh, kaminda tin sufisiente trabou.  "Pero si mi no logra anto e ora ei lo mi tin di buska algu den un sektor diferente. Mi ta dispuesto na hasi kualke trabou", asina Curly a bisa ku'n aktitut desididu.

Skucha Curly Tielman (4'25'')