“Ta un tiki manera fakansi, pero mester studia di bèrdè mes. Nos ta na Boneiru pa un kos so: hasi èksamen final.” Stacey Schotborgh ta ekspresá e sintimentu ku ta reina bou di alumnonan di Vespucci College.

E tres simannan binidero 22 kandidato di èksamen di VWO, HAVO i VMBO ta biaha bai Bonairu pa hasi nan èksamen estatal hulandes.

Areglo
Vespucci College ta sigui e programa hulandes di enseñansa i añanan largu tabatin un areglo pa tene èksamen ku un skol na Nijmegen. Te ora ku sekretario di estado di Enseñansa Marja van Bijsterveldt a para e asuntu aki.

E ora ei e skol mester a kambia pa èksamen estatal hulandes, pero por tene esaki solamente riba teritorio hulandes. Minister a bisa ku e no tin problema si tene e èksamen na Boneiru, ku for di òktober 2010 ta parti di sistema gubernamental hulandes.

Strès
E promé grupo di diestres alumno a sali djadumingu i a pasa un dia di èksamen kaba. Mayoria di e alumnonan no tin problema pa ta for di kas, pero Stacey ta haña masha innesesario anto karu tambe. “Awor tur hende ta trankil, pero mas aworó strès por subi. Anto e ora ei bo ta for di bo mes ambiente. Ami ta strès mashá.”

Organisadó i supervisor Ramon Steuns ta masha satisfecho ku e lokashon na Boneiru. E skol a hür henter landhuis Wanapa den bario di Lac pa e tres simannan binidero. “Aki e alumnonan por prepará pa nan èksamen den tur trankilidat.”

Marine
Maxime tin eksperiensha ku èksamen kaba. E tin su diploma di HAVO i awor e ta bai pa VWO. E no ta haña èksamen na Boneiru un problema. “Bon mirá e kos ta ku suspenso si. Mi por a prepará basta tempu, ke men lag’é bini numa.”

Rick, Jordi i Marijn ta ‘mucha di marine’. Nan ta biba na Kòrsou pa motibu di nan tata su trabou. Nan ta haña e lokashon di e landhuis perfekto i nan ta spera ku nan por pone nan mes studia e dianan binidero. Rick: “no tin mod’e hasi.”

Esaki ta sali na kla tambe ora Steuns anochi sinta ku e mucha hòmbernan di HAVO pa repasá biologia. “E konstrukshon di Boneiru aki ta duna e posibilidat aki: duna e muchanan beilès djis promé ku èksamen”, segun Steuns.