Na Kòrsou a bin haña paña di bisti i mancha di sanger ku por ta di e visekònsùl merikano ku a pèrdè riba e isla. Investigashon forense o sea hudisial na Hulanda mester demostrá e kos ei.

James Hogan di 49 aña di edat no a regresá kas despues ku el a bai dal un keiru anochi den su bario. Ludmila Vicento, fiskal antiano pa prensa ta konta kon e kaso a kuminsá lora.

Kaso di desaparishon
"Djabièrnè mainta 25 di sèptèmber e kasá a presentá un denunsia serka polis di desaparishon di señor Hogan. Si sali for di e punto di bista di un desaparishon ta tene kuenta sí ku tur posibel senario, pero awóraki e úniko kos ku a keda determiná ta ku paradero di señor Hogan ta deskonosí", asina Vicento ta bisa. E ta añadí ku a detektá rasgo sí pero ku mester bin aklarashon riba esei den e investigashon.

Den bisindario di Baya, un playa na e península band'i Caracasbaai, un paseante a haña paña di bisti ku mancha di sanger riba nan. Na e sitio mes tambe a topa ku algun mancha chikí di sanger. "Nos ta investigando e asuntu pa determiná si e pañanan ku a haña ta pertenesé na señor Hogan i si e sanger tambe ta di dje." Djadumingu último a manda e material pa Forensisch Instituut na Rijswijk pa investigá ADN. E pañanan ta kuadra ku deskripshon detayá di e persona sí.

Akshon di búskeda masivo

Djabièrnè 25 di sèptèmber a kuminsá ku un akshon modesto di búskeda pegá ku domisilio di Hogan. Despues di a haña e pañanan a kuminsá ku akshon di búskeda masivo, tambe den bisindario di Caracasbaai. Konsulado merikanu ta envolví den e investigashon i ta inform'é regularmente. Polis di Kòrsou i Ministerio Públiko a start ku un investigashon na gran eskala ku yudansa di Merka i Hulanda. "Na e momento akí marina merikanu tambe ta envolví. Nan a yuda konkretamente ku e akshonnan di búskeda. Nos no ta ekskluí ku lo amplia e koperashon ku otro instanshanan merikanu", segun Vicento.

E aporte di Hulanda ta limitá su mes na algun empleado di detekshon forense i kuater kachó di trein pa detektá kurpa sin bida. A manda nan Kòrsou pa asistí ku e akshonnan di búskeda. Vicento ta bisa ku e posibilidat tei ku lo pidi koperashon di otro instanshanan tambe na Hulanda.

Por lo pronto lo dal bai ku e búskeda tanten ku no haña e diplomátiko.
 

Skucha koresponsal René Roodheuvel