Na Kòrsou Wereldomroep a lansa su wèpsait nobo ofishalmente. Su nòmber ta Aworaki. Wereldomroep a ekspandé den Karibe ku un redakshon nobo na Kòrsou. Ayera a presentá miembronan dje redakshon tambe. Djadumingu, 10-10-10 por skucha transmishon di dos programa, unu na hulandes i e otro na papiamentu. E intenshon ta pa trese notisia i informe di aktualidat na ingles tambe den futuro.

Futuro minister presidènt di Kòrsou, Gerrit Schotte a hasi akto di apertura dje wèpsait nobo na Teatro Luna Blou. E ta kontentu ku redakshon di Wereldomroep: 'E ta mustra e atenshon ku Hulanda tin pa e parti di reino akí...ta un prueba palpabel di esei." Mas aleu el a enfatisá e importansha di notisia fresku, di enfoke profeshonal, di komunikashon i di e arte di periodismo, enfin: e nesesidat grandi di informashon fidedigno.

Kultivá lasonan
Schotte ta apresiá trabou i esfuersonan di hóbennan ku hopi devoshon den mundu di periodismo, manera esnan di Wereldomroep. E ta splika kon esensial e lasonan ekonómiko i di famia ta entre e islanan. Nan no mester kibra. Tin ku kultivá i nutri nan. 'Awor mas ku nunka nos mester ta mas serka di otro.'

Mike Willemse, direktor di Antilliaans Dagblad ta aploudí e paso di Wereldomroep riba tereno periodístiko. "En general ta un idea masha bon mes." Pero e ta atvertí sí ku periodismo na Kòrsou no tin mes rekursonan finansiero ku Wereldomroep. E ta konta ku un aña pasá a hiba un diskushon ku Jan Hoek, direktor di Wereldomroep, tokante un kanal di informashon adishonal. Willemse ta apresiá profeshonalismo di e emisora, ku ta transmití mundialmente.

Diskrepansha
Loke por trese diskrepansha den e parti kompetitivo ta e echo ku medionan di komunikashon na Kòrsou i e demas islanan ta eksistí grasias na patrosinahe. Sin spònser ta difísil pa kubri gastunan djun emisora.

Wereldomroep enkambio ta risibí supsidio di gobièrnu sentral hulandes, i pronto ministerio di Relashonnan Eksterior i di Yudansa di Desaroyo lo atendé ku e parti finansiero dje emisora.

Mike Willemse ta remarká ku en todo kaso Wereldomroep 'no mester bira arogante' i kere ku e ta mió na altura di loke ta pasando na e islanan, awor ku el a subi merkado di media den Karibe.

Direktor di Wereldomroep, Jan Hoek di su banda a bisa for djun prinsipio, ku e emisora ke aportá ku desaroyo kualitativo di media na Antia i ku fortifikashon dje lasonan eksistente n'e islanan, tur esaki atraves di su programanan na radio i riba énternèt.