Inkreibel pero bèrdat: mitar dje awa – skars – di bebe na paisnan den desaroyo ta lèk bai. E motibu p’esaki ta rupturanan den e pipanan di awa, tapmentu ílegal i destrukshon. E kantidat grandi di kuentanan no-pagá tampoko no ta yuda pa reforsá e infrastruktura. Kompanianan hulandes di awa ta entremeté den e provishon di awa di bebe rònt mundu.

E hulandesnan ta apoyá kompanianan lokal na gran eskala pa konektá mas hende ku e reda di awa di bebe, redusí e pérdida pa motibu di lèkmentu, i reforsá organisashonnan. E kompanianan di pipa di awa no ta mira esaki komo labor di desaroyo, pero komo un mankomunidat ku kompanianan lokal di awa; esakinan mes mester bin ku un petishon pa konseho òf kolaborashon.

Entretantu, kompanianan hulandes di awa ta aktivamente enbolbí den basta un par di proyekto di awa di bebe. Ta finansiá esakinan ku supsidionan hulandes i oropeo, òf mediante di crowdfunding (sèn di siudadano i kompanianan hulandes). E siguiente selekshon ta duna un bon imáhen dje problemanan ku e kompanianan hulandes di awa ta hañanan kuné den eksterior.

Sürnam
Waternet (reda di awa) tin 15 aña kaba ta traha riba henter e siklo di awa ku kompanianan sürnam. Segun Ferf Jentink, e kantidat di awa supteráneo ku ta uza na Sürnam ta mas tantu ku e kantidat ku ta yena bèk di manera natural. ‘E awa supteráneo ta bira saliña: ta bini muchu awa salu aseka. Nan mester bòltu pa uzo di awa riba tera i purifikashon di esaki.’

For di dia ku Desi Bouterse a bini na mando atrobe na Sürnam, Hulanda a kibra e lasonan, i pa e motibu akí no por kuminsá ku proyektonan nobo. Por konkluí proyektonan humanitario si. Segun Ferf Jentink, organisashonnan sürnam sí ta mustra di tin hopi nesesidat pa sigui ku e kolaborashon.

Aruba i Bonèiru
Nederlandse Waternet ta traha ku kompanianan lokal di awa na Aruba tambe. Entretantu ya tin tres instalashon di awa residual einan. ‘Awor nos ta yuda solamente di aleu. Na momentu ku tin preguntanan mashá spesífiko, nos ta hala serka pa tira un bista ku nan.’

Kos ta otro na Bonèiru. Awendia e isla akí ta un munisipio di Hulanda i mester korespondé na legislashon hulandes. Ferf Jentink di Waternet: ‘Nos ta apoyá e futuro gerente dje infrastruktura. Ta traha riba purifikashon di sushi i e instalashon di un sistema di kloaka. Nos ta wak kiko ta e rekisítonan organisatorio pa kosnan por kana.’

Segun Ferf Jentink, ta difísil pa yega na un plachi finansiero pa Aruba, pasobra ta trata di un kompania chikí pa 15.000 habitante. ‘Tin poko disposishon pa paga pa purifikashon di sushi, pero e awa sushi aki tin hopi impakto riba e koralnan rònt dje isla. Dje forma akí nos ta purba hala atenshon riba e konsekuenshanan pa naturalesa i medio ambiente tambe. Ta keda na nan si nan ta hasi algu k’e informashon akí. Nos ta keda konsehero; na final ta nan ta responsabel.’

Nicaragua
Na 2005, organisashonnan gubernamental hulandes pa atministrashon di awa públiko a risibí un petishon di yudansa for di Nicaragua. E munisipio Matagalpa mester a para bebementu di awa di riu durante e kosecha di kòfi pasobra agrikultornan di kòfi tabata kontaminá e awa.

Louis Bijlmakers dje organisashon gubernamental pa atministrashon di awa públiko di De Dommel: ‘Nos a apoyá agrikultornan grandi di kòfi k’e desaroyo di un instalashon di purifikashon. E awa ku nan ta basha awor riba e awa riba tera ta ménos sushi. Asina e kalidat dje awa di bebe tambe ta drecha. Awor ta saka mineral tambe for dje awa residual sushi, ku ta pone ku nan por sòru pa nan propio energia.’

E organisashonnan gubernamental hulandes pa atministrashon di awa públiko awor ta bai yuda tuma medida kontra dje inundashon dje dos riunan na Matagalpa, i mehorashon dje riol. Ainda kayanan ta keda bou di awa despues di un palu di awaseru pa motibu ku e riol no por akapará tur e awa.

Poko atenshon pa mantenshon
Tur e kòmbersashonnan ta mustra ku na paisnan den desaroyo tin poko atenshon pa mantenshon i supervishon dje sistemanan di awa. Marco Schouten di Vitens Evidens (un kolaborashon dje kompanianan di awa di bebe Vitens i Evides): ‘Esaki no ta mes sèksi ku plannan di invershon nobo, pero riba término largu e por yudabo dal pasonan mas grandi. Nos mester insistí riba esaki konstantemente. Nan mester sa unda e infrastruktura ta pará. Ki ora sí i ki ora no tin mester di remplasá un piesa, i unda ta lokalisá hopi dje lèknan? E stòk di spèrnan tambe mester ta na òrdu.’

Segun Otto Ferf Jentink di Waternet, e balor agregá di hulandesnan ta den stimulashon di mantenshon riba término largu. ‘Nos ta bon presisamente riba tereno organisatorio i, kompará ku otro paisnan, nos tin hopi konosementu di sistemanan di awa.’