Un piloto di e kompania di aviashon kurasoleño Divi Divi Airlines a pèrdè su bida despues di un aterisahe di emergensha dilanti kosta di Bonaire. Un di e motornan di e avioneta, tipo Britten Norman Islander, no tabata funshoná mas.

 
Erik Hagendoorn tabata na bordo di e avioneta. El a ripará ku e motor a paga i ku e piloto a trata di rekuperá altura i keda den lèira mas tantu posibel. Finalmente e avioneta a aterisá ku'n impakto basta fuerte riba laman, asina el a bisa den deklarashon pa Dolfijn FM.
 
E nuebe pasaheronan por a bandoná e avioneta promé ku el a senk. Nan a purba saka e piloto, k'a pèrdè konosementu, for di e avioneta, pero nan no a logra libr'é di su faha di seguridat. Segun informe di Kòrsou ta trata di un piloto britániko. Aparentemente el a bai fo'i dje despues ku su kabes a dal den e bentana dilanti debí n'e impakto. El a senk ku avioneta ku tur den fondo di laman. Algun habitante di Boneiru ta bisa ku e lugá kaminda el a senk ta hopi hundu, mas o ménos algun shen meter.
 
Un boto den serkania a akudí na e sitio di aksidente pa reskatá e nuebe pasaheronan. Nan a keda levemente eridá i a hiba nan hòspital pa tratamentu médiko. Ta hendenan di Kòrsou i di Hulanda.
 
Fuentenan fidedigno na Korsou ta enfatisá ku e piloto tabata morto kaba na momento ku e pasaheronan a trata di sak'é for di su stul.
 
Divi ta un kompania aéreo regional chikí, ku ta bula ocho biá pa dia entre Kòrsou i Boneiru. Na 2001 el a kuminsá ku su servisio aéreo na Kòrsou. 
 
No ta konosí ainda dikon e motor a faya. Siman pasá un avioneta ku 412 kilo di kokaína a kai na e mes sitio. Dos persona a pèrdè nan bida na e okashon ei.