Ocho luna largu Ministerio Públiko na Korsou ta warda informashon di e yamadanan di sospechoso N.N. E kompania lokal di telekòm Digicel lo mester a duna polis esakinan. E datonan ta krusial pa solushoná e atrako violente riba Pieter i Marion van der Burgh. Digicel ta bisa ku nan no sa nada di un petishon di Ministerio Públiko.

Dia 26 di yüni di aña pasá a atraká e pareha na un manera bestial. E malhechornan a bati e dos médikonan ku un pata di kabra i a laga nan pa morto den nan kas na Boka Samí. A arestá un di e probabel aktornan, N.N. basta lihé, pero a lag’é bai atrobe despues di tres dia. Amigunan a dun’é un álibi ku ta klòp. E álibi aki ta kaduká si for di informashon di Digicel lo sali ku N.N. a log in e anochi di 26 di yüni na Boka Sami.

Repúblika dominikano
Ocho luna largu polis a sa di bisa ku Digisèl ainda no a entregá e datonan, pasobra nan ‘mester bini for di Repúblika dominikano’. Henter e asuntu asta lo ta na nivel di ministerio pasobra Ministerio Públiko lo no ta haña nada seka Repúblika dominikano.

“Na Digicel no a drenta niun petishon di Ministerio Públiko pa entregá informashon di yamada di N.N.” segun un bosero di e kompania. Digicel ta asta sigurá Wereldomroep ku semper nan ta koperá kompletamente ku hustisia. “Pa laga un petishon para ocho luna, segun Digicel ta apsolutamente imposibel” e bosero ta bisa.

Di kasonan penal anterior ta konosí ku a entregá e datonan kasi mes ora. I nò via Repúblika dominikano. Un ruta ku pa e bosero di Digisèl tambe ta zona deskonosí.

Petishon nobo
Relatá ku e investigashon di Wereldomroep e kompania di telekòm mes ora a buska kontakto ku polis. “Djaluna nan lo manda un petishon di nobo”, Digicel ta bisa.

Pieter i Marion van der Burgh ta haña kondukta di Ministerio Públiko entre tantu ta laga di deseá. “Si nos mes Ministerio Públiko no por saka e datonan aki den kaso di un krimen severo, bo tin un problema komo komunidat”, segun e pareha Van der Burgh.