Ku un maneho di shushi kontrolá na Landfill di Malpais ta tene kuenta ku salubridat públiko. Direktor Heinrich Coffie di Malpais ta splika kiko ta e pasonan ku ta tuma riba e kaminda di tira shushi pa protehá salubridat riba e isla. Kon Landfill Malpais ta traha? Un reportahe di inspekshon pa e rúbrika Parada.

Riba planonan mas grandi ku un vèlt di futbòl diariamente binti trùk di e kompania di trata shushi Selikor ta basha e shushi di kas ku nan a hisa. Tur dia ta basha un total di entre sinku pa seis tòn di shushi. No Selikor so sino kompania i persona privá tambe. Tin di e serunan di shushi ku ta bèrdè bèrdè, yen di vegetashon. “Ta seru di shushi di mas ku dies aña bieu. Ta tera fértil pasobra e tin hopi nutriente pa motibu ku a dera shushi aki”, segun Cofie.

Krítika
Siman pasá Landfill Malpais a haña krítika. E lugá di tira shushi lo tabata e kousa di un plaga di muskita enorme ku tabata molestiá espesialmente Bandabou. E plaga lo a originá pasobra na Landfill lo no tabata tapa e shushi sufisientemente, asina e krítika tabata. Coffie ta splika ku tapamentu di shushi ta un parti diario di e prosedura ku nan ta sigui. “Nos mester pèrkurá pa hende no bira malu. Ta p’esei ta tapa tur dia. Ta parti di nos maneho di higiena.”

Coffie ta bisa sí ku dos siman pasá Malpais tabatin hopi mas shushi ku normalmente. Esaki tabata pa motibu di fiesta di Santa Komunion. Coffie: “Hopi kas di famia tabatin mas shushi ku nòrmal. E tempu ei tabata imposibel pa tapa tur shushi den un tiru. Si tur kos kore bon nos ta alkansá e retraso e siman aki.

Coffie ta kere ku e kantidat di muskita riba e isla tin di hasi ku e temporada di kalor i sekura na Kòrsou. “Ta mashá kalor i bo ta mira ku bestia manera yuana i para tin molèster di esaki. Muskita tambe ta reprodusí mas tantu den e temporada di sekura ekstremo. Ta normal ku muskita ta bai kaminda tin shushi, ke men nan ta bini Landfill. Ta p’esei mester tapa shushi aki.”

Katapila
Espesialmente den oranan di meinta trùknan di Selikor ta kore bai i bini ku nan shushi di kas. Nan ta basha esaki riba e shushi di kompania i kas ku a basha un dia promé. Pa dia desena di trùk karga ta para na entrada di Malpais. Ta pisa nan riba un balansa enorme. Coffie: ”Despues nan ta subi e seru pa bai basha. Ora nan sali e tereno ta bolbe pisa e truknan, asina nos sa kuantu shushi a basha.”

Esaki ta komienso di e trabou di prosesá shushi. Riba e tereno tin katapila pará kla. Asina ku a basha un sierto kantidat di shushi, un katapila enorme ta kuminsá move, Coffie ta splika. “E ta parti e shushi miho riba e tereno i ta sigui push’é bai abou. Asina e shushi ta sigui kai mas abou kada be na otro banda di seru.” Manisé ta basha e shushi di kas ariba. Atrobe katapila ta parti e shushi poko poko, despues ta tap’é ku greis. E ora ei e proseso a kaba. E ora ei Malpais ta skohe un otro parti di e plano komo lugá di basha.