Nashonnan Uní a proklamá 2011 komo aña internashonal di hende di desendensha afrikano, anto pa años kaba febrüari ta Black History Month, o sea luna di istoria pretu entre otro na Estados Unidos. Motibu pues pa asosiashon di studiante ASAH organisá diferente aktividat e luna akí ku e lema: “Nos tur ta afrikanu.”

Association of Students of African Heritage (ASAH) a organisá un nochi di diskushon i un sho di moda ku bistí tradishonal di kontinente afrikanu i di e diáspora. Presidente Lilian Ejiofor ta kere ta importante pa hende di desendensha afrikanu dediká atenshon na Black History Month na Hulanda tambe: “Nos tin un istoria úniko.”

Diáspora
Mester lanta un komunidat di diáspora afrikanu, na pareser di e presidente. E ta spera ku e aktividatnan na 2011, o sea di e aña akí por kontribuí ku esei. “Nos mester yuda otro progresá.” Pa studiante e por yuda evitá sintimentu di soledat, segun Ejiofor, pasó hopi biá nan ta e úniko studiante pretu na un campus.

ASAH ta konsistí di studiante sürnam, antiano i afrikanu. Ejiofor mes ta di orígen nigerianu. “Nos tin hopi kos en komun.” Na e sho di moda por a mira semehansanan opvio manera simbolismo i nifikashon di lens'i kabes. Pero hopi be e manera di papia i di pensa tambe ta similar: “Por ehèmpel nos tur sa chiu." (na sürnam: tjuri)

Tur ta neger
Un diferensha por mira hopi be sí  den e manera ku hende ta anda ku nan desendensha afrikanu. “Hopi hende no ta sinti nan mes na kas ku esei.” Sinembargo tin sufisiente semehansa, por ehèmpel e manera ku mundu eksterior ta mira e gruponan: “Nos tur ta pretu, pa nan nos tur ta neger.”

Sürnam i Antianonan tin otro norma i balornan ku Afrikanunan, asina Ejiofor ta rekonosé. Pero sorprendentemente tin hopi kos paresido sí: “Sranantongo parse pidgin English mashá. Ora bo tende hende papia, e parse afrikanu anto e or'ei mi'n por laga di drei wak.”*

*Un sensashon paresido ta surgi serka portugues-kaboverdiano i papiamentu ku nan similaridat di palabra i melodia di frase; ora bo tende hende papia riba kaya kasi no por distinguí e dos idiomanan akí-nota di red)