Asombrá. Asina Juan Walter, funshonario antiano di GGD ku ta traha pa emansipashon seksual a reakshoná, ora el a tende ku aña pasá e kantidat di homoseksual agredí na Amsterdam a oumentá ku 24 porshento.

Walter ta referí na un inbestigashon hasí pa sekshon di homoseksual den kuerpo polisial di Amsterdam. Nan ta traha estrechamente ku C.O.C., e organisashon ku ta sali na defensa di homoseksual, lesbiana, biseksual i transseksual na Hulanda. Walter a keda asombrá ku resultado di e inbestigashon, pasó Amsterdam tin vários organisashon ku tin komo meta pa siña komunidat aseptá tur tipo di seksualidat.

Mayornan lo por kontribuí pa yuda baha e kantidat di kaso di agreshon kontra homoseksualnan. Nan por siña nan yunan ku fuera di pareha heteroseksual tin tambe pareha homoseksual, i ku porehèmpel un hende por ta transseksual tambe. E inbestigashon ta indiká ku ménos ku mitar di e kantidat di homoseksual agredí ta hasi denunsia na polis.

Eduká polis
Por konsiderá esaki komo un adelanto, esta ku tin un grupo ku ta hasi denunsia. Di otro un banda: Walter ta haña importante tambe pa eduká polis, pa nan sa kon anda ku sierto tipo di denunsia. Segun e, hopi biaha ta asina ku polis no ta tuma denunsia di homoseksual na serio. Mas biá homoseksualnan akudí na polis pa denunsiá agreshon kontra nan, mihó pa asina duna e problema e atenshon ku e meresé.