Korte na Utrecht a sentensiá Naigel Q. di 23 aña na shete aña di kastigu i tratamentu obligatorio den un sentro sikiátriko (tbs) pa asesinato dje studiante arubano di 24 aña Ingar Bareno. Q. a hinka e víktima mata na novèmber 2008 den un flèt di studiante na De Uithof na Utrecht.

E víktima, un studiante di kímika na Hogeschool Utrecht, a bai e kompleho di studiante huntu ku su amiga pa intermediá den un pleitu entre un habitante femenino i su amigu Q. Kasi dirèkt Q. a kuminsá hinka Bareno ku un kuchu. Q. tabata kere ku su amiga a kòrta su orea ku e víktima.

Premeditá
Korte a bisa ku e akshon dje sospechoso pa hinka e víktima tabata premeditá, pasobra por a konkluí esaki for di ekspreshonnan dje sospechoso previo e yegada di Bareno. Q. a usa kokaina promé ku Bareno a yega serka dje i el a skonde un kuchu den su paña.

Mas aleu korte a haña e hòmber kulpabel na intento di homisidio di su amiga. Pa su amiga konfesá ku el a kòrta su orea, Q. a bati'é, skop'é i hork'é riba e dia dje hinkamentu.

Malesa di personalidat
Segun ekspertonan Q. ta sufri di malesa di personalidat i pa e motibu ei e ta mentalmente ménos kapas pa su aktonan. Esei ta motibu pa korte lag'é haña tratamentu den un klinika sikiátriko. E kastigu sentensiá ta konforme e eksigensha di fiskal.

"Un kastigu muchu abou", asina mama di Bareno ta bisa. "Un hende asina no mester forma parti di sosiedat." Un kastigu di bida largu tampoko lo no a importá, segun e mama, pasobra e nunka e no ta haña su yu hòmber bèk. Pues un eventual apelashon no tin sentido: "Mi yu hòmber mester sosegá."E ta haña ku e amiga di Q. tambe ta kulpabel i mester a husg'é.