Elekshon oropeo ta den kurpa asina ta ku e kandidatonan arubano ta traha duru pa gana e votadó antiano i arubano na nan banda. Na momento ku Mito Croes, kandidato pa CDA a subi kaya na Den Haag, Nadya van Putten di GroenLinks a barka bai Aruba.

Nadya van Putten (28), e di sinku kandidato riba lista di GroenLinks, ta spera sinseramente di por gana gran parti di e votonan registrá. E hóben di orígen rubiano ta kore p'akí p'ayá rib'e isla. E ta presentá den programa di radio, e ta bishitá vários bario i e ta flayer kant'i kaminda sperando di por konvensé e votadó potensial pa vota p'é.

Kara nobo
Klaro, e rivalidat ku Mito Croes di CDA ta grandi. "Pero na Merka tambe a skohe pa un kara nobo i pa kambio. Croes ta representá eksperiensia, pero Van Putten ta para pa un kara nobo", asina Rudi Lampe a bisa yen di speransa. Lampe ta kabesante di partido RED i liá ku GroenLinks di Hulanda. "Ta típiko dje époka akí pa opta pa kambio."

Turesten Mito Croes ta trata di gana públiko di kompra na Den Haag pa bai vota. Croes ta kandidato number diesun riba lista di e Demókratanan kristian. E tambe tin pleno konfiansa den su mes. "E posibilidat di keda eligí ta grandi. Mas ku 19.000 hende na Aruba por bai vota."

Aislá
Croes ke hasi esfuerso máksimo pa region karibense den relashon ku Oropa. "Semper e islanan tabata mashá aislá den nan mes region i muchu orientá riba Hulanda. A bira tempu pa konsentrá riba e kader mas grandi." Asina ta ku Croes ke bai Bruselas.

Pero promé ku yega asina leu é i Van Putten mester hasi hopi trabou ainda. Van Putten ta hasi esaki papiando ku hende. Na San Nicolas e ta kana bai serka un grupo di mucha hòmber ku ta hunga básketbòl. Nan a yega di tende di elekshon oropeo sí, pero registrá? Nò, esei nò. Awèl, ban parti flayer antó kant'i kaminda. Ku su mama banda di dje. "Semper mi ta hasi esfuerso p'e, pero ta promé biá ku e ta hasi un kos asina grandioso", asina mama di Nadya ta bisa orguyosamente.

Na Hulanda Croes ta preferá konsentrá riba e grupo meta. "Parti flayer no ta efektivo. Riba kaya tur hende tin purá."