E merikanu Gary Giordano ta liber atrobe despues di a pasa kasi kuater luna den sèl na Ruba. E ta keda e úniko sospechoso den e kaso di desaparishon di Robyn Gardner, su kompañero di biahe. Chris Lejuez ta di opinion ku no tin prueba kontra Giordano.

Robyn Gardner a pèrdè dia 2 di ougùstùs, anto segun Giordano e no a drif bin ariba mas ora ku nan dos tabata snòrkel. Siman pasá wes komisario a disidí ku no tin sufisiente base pa sigui prolongá aresto preventivo di Giordano. Ministerio Públiko (OM) ta bai apelá desishon di wes, pero ta teme sí ku e merikanu lo bandoná Aruba lihé.

Giordano a ninga di papia ku prensa merikanu i lokal na salida di prizòn. "E ta kontentu ku porfin e ta liber atrobe", asina su abogado arubano Chris Lejuez a bisa. E konsehero defensor no kier a bisa kiko su kliente ta bai hasi awor. En todo kaso, dia ku apelá e kaso, Lejuez lo boga den korte pa konfirmá e echo ku a duna su kliente libertat. E abogado arubano lo keda envolví den e asuntu. "E kaso por dura años", asina e ta kalkulá.

Deber moral
E echo ku atrobe un dama merikanu a somentá na e isla despues di desaparishon di Natalee Holloway no mester hunga un ròl.

Interes arubano no mag prevalesé riba esun di hustisia, asina Lejuez ta atvertí: "Mi no sa si esei a hunga un ròl. Te awe semper e persona akí a bisa di ta inosente. E investigashonnan di Ministerio Públiko no a kondusí na algu ku ta mustra den direkshon di un krimen. Nos tin e deber moral pa lag'é bai."

Den tur esei Ministerio Públiko ta sigui sin mas ku indagashon dje desaparishon di Gardner. Abogado general (AG) Taco Stein ta bisa ku despues por pidi pa ekstraditá Giordano, si esei resultá nesesario p'e investigashon: "Nos ke kontesta i nos ke sa kiko a pasa. Ademas e famia mester di klaridat rib'e asuntu." Ta falta tur indikashon di eksistensha di un otro sospechoso, siendo ku sí tin indikashon ku istoria di Giordano no ta kuadra.