Gobièrnu MEP ta bai, lagando Aruba finansieramente mas salú ku ten el a sinta, esta na 2001. Esaki segun e minister demisionario di Finansa, Nilo Swaen.

Jos de Roo
 

E défisit presupuestario a baha, meskos ku e suma di claim ku tin riba gobièrnu. E peso di debe estatal sí a subi, pero esaki ta debí na e défisit serka AZV (Algemene Ziektekosten Verzekering) i e loke gobièrnu debe APFA, o sea fondo di penshun di Aruba.

Swaen ta kere ku situashon finansiero-ekonómiko di Aruba ta stabil. Na 2009 e ta laga un défisit presupuestario atras di 97,5 mion di florin, siendo ku e tabata 134 mion, tempu ku el a asumí puesto di minister di finansa na 2001. Fuera di esei tabatin debe e aña ei. No a paga APFA nada bèk, asina ta ku a krea un debe di 277 mion di florin. Swaen a paga e fondo semper komo debe ser den e periodo komo minister di finansa.
 

Claim
Tambe el a hañ'é ku un montante enorme na claim pa motibu di garantia ku hotèl a duna i proyektonan kanselá. Tabata trata di un total di 607 mion. Loke a keda ainda na claim ta 133 mion. Swaen a keda kontentu i su konklushon ta: "Loke nos ta laga atras ta un pais finansieramente stabil i mi ta spera ku en todo kaso lo kontinuá ku e maneho i ku lo paga tinu ku kreashon di debe ku na final por kosta pueblo masha hopi plaka mes."

Pero e situashon finansiero ku Swaen ta pinta tin un aspekto negativo tambe. For di 2001 peso di debe di  Aruba a subi ku 633 mion. Swaen ta defendé su mes mésora. Mester a paga e loke tabata debe fondo di penshun APFA, ku ta un montante di 277 mion. Esaki ta konta tambe pa e défisitnan kontínuo serka AZV ku ta den kareda di sinkuenta pa sesenta mion pa aña. Pa e fin akí mester a fia 283 mion.

Swaen no ta haña ku ta e gobièrnu aktual a okashoná oumento di peso di debe nashonal. El a kambia e areglo di penshun kaba pa empleadonan di gobièrnu ku ta drentando den servisio. Ademas, e défisitnan serka AZV ta persistente, apesar di tur e diskushon i komishon ku a studia e asuntu den pasado.