E poéta i artista di teatro yu di Kòrsou Quinsy Gario i rèper Kno’Ledge Cesare, ku polis a detené durante yegada di Sánikolas na Dordrecht desèmber aña pasá, a keda apsolvé. Awo Ministerio Públiko ta bisa ku a detené e dos hòmbernan ku t-shirt bistí ku e teksto ‘Zwarte Piet is racisme’ inhustamente.

E desishon di Ministerio Públiko no a sorprendé Gario. E ta bisa ku komo artista e ta haña bon ku hustisia a vense. OM no por a bin ku ningun otro konklushon tampoko, asina Gario ta bisa, pasó nan no a hasi nada fout.

Eksküs
Gario no por bisa ahinda si e kaso a pasa pa olvido kaba. Huntu ku Cesare e ta bai deliberá ku su abogado. En todo kaso nan ke pa alkalde di Dordrecht pidi despensa. Despues di detenshon di Gario i Cesare, alkalde di Dordrecht a bisa den un karta habrí pa medionan di komunikashon, ku e dos hòmbernan ta hende ku ta kana krea problema.

Via di un bosero, alkalde Arno Brok a duna di konosé entre tantu ku e no ta bai ofresé diskulpa pa detenshon di e dos aktivistanan. E alkalde miembro di partido VVD ta bisa tambe ku el ‘a tuma nota di veredikto di Ministerio Públiko’. E  ta ‘desapuntá’  ku OM ta bisa ku a detené e dos aktivistanan innesesariamente i e ta keda para riba loke el a bisa anteriormente: ku fiesta di Sánikolas ta un fiesta pa mucha i ku ningun hende no tin mag di strob’e.

Lanta diskushon
Quinsy Gario ta kontentu ku nan akshon di protesta ku e t-shirt a lanta un diskushon tokante Zwarte Piet. Último lunanan el a partisipá na diferente debate riba e tópiko aki. Ta esei tabata nan meta prinsipal: lanta diskushon. No ta na nan pa prohibí Zwarte Piet òf bin ku un alternativa, asina e poéta ta opiná. Pero mediante e diskushon, hendenan ta bira mas konsiente di unda Zwarte Piet ta bin i ta esei ta e meta.