Si tin un kos ku habitantenan di Rincon ta orguyoso di dje esei ta nan dia: Dia di Rincon. Un dia ku Broertje Janga, un dje prominente habitantenan di e bario, polítiko, eskritor, kulturista, a krea kasi 25 aña pasá kaba. Janga mientrastantu a fayesé na 2003, pero ‘Dia di Rincon’ t’ei mas fuerte ku nunka.

Broertje Janga pa añanan tabata soña ku un dia riba kua Rinconeronan por a etalá nan ekspreshonnan kultural, nan kustumbernan i nan historia. Awe ‘Dia di Rincon’ a pone tur hende lubidá riba Aña di Lareina ku ta selebrá den Reino Hulandes dia 30 di aprel tur aña. Ku yudansa di hopi hende ‘Dia di Rincon’ a bira realidat. Pero a dura te na momentu ku e partido di Janga, Partido Obrero Boneriano, tabata den gobernashon pa por a realisá e dia aki. Na e momentu ei tabatin e boluntat polítiko.

Kultura
E intenshon di ‘Dia di Rincon’ tabata pa eksponé e kultura di Rincon. Esaki a sali bon na kla tambe den sigur e promé dos pa kuater selebrashonnan di e dia. Hendenan bistí di trahenan di ántes, pushando krenwa, muhénan disfrasá na sùr, muhénan ku karga di palu òf bleki di awa riba kabes. Esenanan ku tabata rebibá e bida i trabou di ántes di Rinconeronan.

Banda di esaki a krea oportunidat pa hendenan di Rincon hasi negoshi, bende platonan típiko dje bario, kabritu, piská, yuana, pa no lubidá e bachibachi, un plato ku ta konsistí di partinan di kabritu ku normalmente no ta usa pa konsumo. Awendia bachibachi ta un delikadesa. Meskos tambe kuku hòrná, ku ta bini di un dje tiponan di ‘agave’ ku tin den naturalesa boneriano.

Propio bandera
Rincon ta e úniko bario di Boneiru ku tin su propio bandera, asta su propio ‘himno’, miéntras ku tur aña tin tambe e festival di kanto krioyo en konekshon ku ‘Dia di Rincon’, ku tantu un seshon pa hende grandi komo un seshon pa mucha, ku e aña aki ta bai respektivamente riba djasabra I djadumingu benidero.
“Henter luna di aprel ta luna di Rincon”, un habitante maskulino dje bario ta broma. I ku su rason, pasobra ta henter luna tin aktividat, entre otro loke ta konosí komo ‘Den Trin’, un seri di aktividat musikal durante algun fin di siman den preparashon pa ‘Dia di Rincon’.

Rincon no ta solamente e pueblo mas bieu di Boneiru, ku ta eksistí ya kaba for di tempu spañó. Ta aki Spañonan a establesé nan atministrashon di Boneiru. Rincon ta bon protehá pa seru, ademas tabatin bon awa supteráneo. Ademas Rincon ta konosí komo e kuna di kultura boneriano. Ta aki mayoria grandi di e kantikanan krioyo di Boneiru a nase. Aki e kantadónan di simadan di mas konosí a biba, manera Nemensio Winklar, Ana Thodé, Felipe St. Jago, Agustin Kroon i hopi mas.

No tin lugá
Ya for di lunanan promé ku selebrashon di ‘Dia di Rincon’ no tin lugá mas riba e avionnan ku ta bula pa Boneiru. Tur kupo ta bendé ku hendenan di tantu Kòrsou komo Boneiru ku ta biaha na kantidat grandi pa Boneiru pa selebrá ‘Dia di Rincon’. Despues di e morto di Broertje Janga su yu hòmber Fransisco (Bubuchi) Janga a sigui na timon di ‘Dia di Rincon’. Huntu ku su tim e ta trata na sigui mantené e evento grandi aki ku su tata a prinsipiá.