Gobièrnu di Hulanda mester kuminsa traha serio riba maneho di Antiano. Pa duna nan un man Movimentu Antiano i Arubano pa Promové Partisipashon (MAAPP), huntu ku e Munisipionan di Antiano, lo formulá e puntonan di akshon mas importante.

Raymond Labad di MAAPP ta haña ku gobièrnu no tin sufisiente atenshon pa e Maneho di Antiano. "Ta p'esei nos mes lo bai ofresé gobièrnu e ingredientenan pa realisá esaki. Mester bini un maneho efisiente pa e kuater añanan binidero."Dia promé di febrüari 2008 gabinete Balkenende a establesé e Maneho di Antiano nobo. Pero te awe no a ehekutá esaki.

Dia 10 di òktober representantenan di Munisipionan di Antiano, mandatarionan i organisashonnan Antiano lo topa na Dordrecht pa interkambiá di idea i pa pone riba papel ta kua asuntunan ta pidi mas atenshon. E konferensha tin komo título: "Ban pa un Maneho di Antiano final".

Prioridatnan
Un di e prioridatnan di mas importante ta pa involvi komunidat Antiano i ekspertonan pa reforsá e laso entre mandatario i Antiano, segun Labad. "Tin sufisiente eksperto." Ademas e ke sali for di e planifikashon di término kòrtiku ku nan ta usa hopi awendia. Komo prioridat konkreto e ta mira entre otro hoben sin trabou, òf ku no a kaba skol, mama tiner, kriminal hoben i eks prisonero.

Durante di e konferensha e Munisipionan di Antiano lo interkambia eksperienshanan i mira 'best practices' pa siña di otro.