Soño di Ruthmilla Cicilia di fundashon Zorgcocon-Kwido pa Anciano na Rotterdam, lo bira realidat: otro luna lo akogé un komunidat chikí di Antiano demente, di edat avansá, i lo brinda kuido 24 ora pa dia, teniendo kuenta ku kustumber, norma i balor di nos grandinan na Hulanda.

 
Koheshon sosial
 
Meta di Ruthmilla Cicilia, kordinadó di kuido di ansiano i alabes miembro di Alzheimerstichting, ta pa fortifiká e koheshon sosial den seno di e grupo meta di, ban bisa, 24 grandi demente.
Despues di un investigashon profundo riba fasilidatnan pa grandinan antiano ku ta birando 
demente, Ruthmilla a bin haña sa kiko ta hasi falta na Rotterdm: un tipo di konbibensia 
na eskala chikí pa e grupo akí di hende mayor di 65 aña.
 
E ta konvensí ku kada Antiano di edat avansá, i ku ta dependé di kuido na kas, tin derechi di biba den un ambiente, ku ta ofresé e oportunidat aki. Un ambiente kaminda tin hopi atenshon i rèspèt pa su trasfondo 
kultural i pa su tradishon i kustumbernan.
 
Efektonan positivo
 
Ruthmilla su inisiativa ta trese efektonan positivo kune. 
Na promé lugá ta fortifiká e koheshon sosial den e grupo, manera a splika kaba. Ademas e 
ta ofresé e oportunidat di trabou pa Antianonan mes. Fuera di esei e ta yuda drecha 
reputashon di alóktononan na Rotterdam.
Tur esaki ta korespondé ku intenshon di e munisipio pa desaroyá maneho di alóktono na e 
siudat.
 
Un lokalidat digno pa nos grandinan
 
E deseo di Ruthmilla ta pa realisá un bibienda atraktivo i digno di nos grandinan. 
Personal médiko antiano diplomá lo ofresé kuido 24 ora pa dia en koperashon ku famia i 
boluntarionan. 
 
E idea básiko ta pa konservá e kultura di kolektivismo, di e 'nos' ku ta ankrá den e 
mentalidat antiano, na lugá di esun ulandes ku ta fokes meramente riba e individuo, riba 
e 'ami'. E lasonan tradishonalmente fuerte den seno antiano tampoko no mester bai pèrdí.
 
Dia 8 di desèmber 2009 lo hasi akto di apertura di e promé bibienda komun. Un komunidat 
inisial di seis ansiano lo bai biba n'e residensia, ubiká den un di e edifisionan di 
Zorgcentrum Simeon en Anna, tur esaki en koperashon ku Stichting Laurens.
 
Skucha Rutmilla Cicilia den kòmbersashon ku Sharon.