Komunidat antiano konosé bários siudadano ehemplar ku ta hasi un bon trabou sea den anonimidat òf publisidat. Gianward Lacroes ta rèpdó Pugistics di K-Liber i alabes dosente di biologia. Marvelyn Wiels ta un mènedjer haltu di ABN/AMRO. Lacroes i Wiels ta djis dos ehèmpel di e tantísimo rolemodelnan antiano ku tin aki na Hulanda.

Maske Lacroes no ta konsiderá su mes komo 'rolemodel', e ta konsiente sí ku komo dosente rèpdó e tin e funshon ei. Pará dilanti klas Lacroes tin e bentaha ku su alumnonan konos'é komo rèpdó, esei ta pone ku e ta logra mas serka nan pasó nan ta apresi'é komo artista.

Su trabou ta dun'é chèns tambe di mustra ku e imáhen negativo ku tin di rèpdó no ta kuadra ku realidat. Lacroes ta e prueba ku bo por ta ta rèpdó sin ku bo ta kumpli ku e imáhen di bòshi sèn, muhé i outo karo. E alumnonan ku ta respetá Lacroes komo rèpdó ta ripará ku den bida bo por ta artista i dosente.

Skucha un entrevista ku 'Pugistics'

Marvelyn Wiels ta e úniko mènedjer femenino den e divishon di "Trade Operations'di ABN/AMRO na Hulanda. Wiels no ta konsiderá su funshon haltu komo ehemplar pa otro hende, sino mas bien e lucha ku el a hiba pa por a yega asina leu. E ke mustra otro hende ku bo por logra masha hopi basta bo ke esei di bèrdè.

E tin un prekupashon partikular ku alumnonan di VMBO, ku ta kere ku nan no tin nodi di kaba skol pasó nan ke bai hiba un bida di luho. Hopi biaha esei ta pone nan skohe kaminda robes. Wiels ta splika e hóbennan akí ku tin un alternativa. Ku nan por logra loke nan ke.

Via su trabou e ta sòru pa trese hóben marginá den kontakto ku su koleganan ku sí a logra algu den bida, pa asina e hóben komprondé ku e tambe por logra algu.

Skucha un entrevista ku Marvelyn Wiels