Di tur antiano ku a entrevistá, 40 porshent ta pensa positivamente dje konstelashon estatal nobo di Antia ulandes. Un enkuesta ku Wereldomroep a laga hasi na tur sinku isla di Antia ta demostrá esaki. Komo 30 porshento ta neutral, 24 porshento ta pensa negativo miéntras ku 6 porshento no a duna opinion.

Kasi mitar djesnan entrevistá ta kere ku e relashon ku Hulanda lo drecha ku e repartishon estatal nobo den Reino. Un minoria di 21 porshento tin idea ku e relashon lo empeorá. E gran mayoria di antiano ta konsiderá e laso ku Hulanda importante, sobretodo pa motibu di famia, pero tambe debí n'e relashon finansiero ku Hulanda, na enseñansa i e pasport.

E relashonnan k'e otro islanan ta keda di gran interes pa mayoria antiano. Esaki sobretodo debí n'e relashonnan eksistente di famia. E gran mayoria di 89 porshento gustosamente ke keda na altura dje desaroyonan n'e otro islanan. Mas chikí e isla ta, mas importantansia e habitante ta duna na sa kiko ta pasando n'e otro islanan.

Islanan chikí
Na e islanan mas chikí, esta Sint-Eustatius i Saba tur hende ta sigur ku yudansa di Hulanda ta keda nesesario. E konvikshon ei ta ménos presente n'e otro islanan.

Na Kòrsou i Sint-Maarten mayoria habitante ta preferá dòler merikanu komo moneda legal enbes di florin karibense, asina Wereldomroep a konstatá.

Djadumingu, 10 di òktober 2010 (10-10-10) Antia ulandes ta stòp di eksistí. Kòrsou i Sint-Maarten lo bira paisnan den seno di Reino ulandes. Entrante e fecha ei Boneiru, Sint-Eustatius i Saba ta bira munisipionan spesial di Hulanda. Pues ofishalmente lo no eksistí antiano mas. E or'ei nan lo bira rubiano, kurasoleño, sanmarteño i hulandes.

Ta posibel ku e término 'antiano' lo keda eksistí na Hulanda. Despues ku a proklamá Statùs Aparte di Aruba na 1986 tambe mayoria hende a sigui yama e arubanonan antiano, manera semper.