Antia ulandes ta laga di deseá ora ta trata di kombatí trafikashon ilegal di hende. E konklushon akí ta pará den un rapòrt merikanu di ministerio di Asuntunan Eksterior. Antia ta figurá riba un watchlist.

E rapòrt ku ta hiba nòmber di 'Trafficking in Persons' (Tip) ta sali tur aña i ta kubri e periodo di aprel 2008 te mart 2009.

Judith Keller, konsehero riba tereno di trafikashon di hende, no ta sorprendí ku Antia ta riba e lista akí. Keller ta di orígen antiano. E tin trinta aña kaba bibá na Hulanda i e ta traha na Centrum Mensenhandel na Amersfoort. "Nos tabata sa ku Antia mester hasi un ke otro ainda pa pone kos na òrdu."

Keller ta splika ku trafikashon di hende ta nifiká eksplotashon seksual pero tambe oportunismo ekonómiko. Ainda no tin lèi dirigí riba kondena di trafikashon di hende. E ta mustra sí riba e echo ku e tres ministernan di Hustisia di Hulanda, Antia ulandes i di Aruba a firma un tratado (yanüari 2009, red.) den kua ta menshoná kombatimentu di trafikashon ilegal di hende komo prioridat.

Keller mes ta biaha regularmente pa Antia pa duna informashon ayá: "Na un komunidat di skol na Boneiru nos a konta e muchanan ki ta e señalnan di trafikashon di hende." Resientemente a tene un kampaña di radio na Kòrsou den kua ta spièrta hende pa tipo di práktikanan asina na Antia.

E konsultor ta spera di kurason ku otro aña Antia no ta riba e watchlist ei mas. "Nos no tin garantia pasobra nos mester di lèi pa drecha kos. Tambe mester di akomodashon pa víktimanan di trafikashon di hende. No mester manda e hendenan ei bèk pa nan pais turesten ku e trafikadó ta sigui kana liber."