Durante segundo guera mundial, a deportá kasi 18.000 mucha fo’i Hulanda, i a matanan den e kampnan di anikilashon dje nazinan. Pero den un buki nobo i un ekshibishon nan ta haña nòmber i kara.

Entre 5 di jüli 1942 i 13 di sèptèmber 1944, nazinan a deportá 17.964 mucha hulandes, i a matanan den e kambernan di gas na Auschwitz i Sobibor. Ta trata 17.841 mucha hudiu i 123 mucha gitano roma i sinti, tur bou di 18 aña di edat.

E sifranan aki ta zona friu i apstrakto. Outor Guus Luijters i investigador Aline Pennewaard ke saka e muchanan aki fo’i anonimidat. Pa kada unu dje 102 transportashonnan di trèin k’a sali fo’i Kamp Westerbork na Drenthe, nan a aberiguá kua muchanan tabata den e wagonnan.

Potrèt
E speurtocht di aña largu a bin resultá den e buki In Memoriam, de gedeporteerde en vermoorde Joodse, Roma en Sinti kinderen, 1942-1945 (Den memoria, e muchanan hudiu, roma i sinti, deportá i asesiná, 1942-1945). Di 2900 mucha nan a rekuperá potrèt tambe. Parientenan k’a sobrebibí e guera, amigunan i bisiñanan dje tempu ei a manda potrèt p’e outornan despues di un yamada. Ta trata un meskla di potrètnan di famia, di klas i pasfotonan di muchanan ku miradanan liber di preokupashon, ku ta wak den e ophetivo.

Na final, e buki a bira algu modesto, ku poko mas aparte di nòmbernan, adrèsnan, fechanan di nasementu i fayesementu, i potrètnan. Deliberadamente, pasobra segun Luijters ‘e buki no t’ei pa lesa, pero pa t’ei’.

Ekshibishon
Archivo di siudat Amsterdam (Stadsarchief Amsterdam) ta dediká un ekshibishon n’e buki In Memoriam. E punto sentral t’e mesa largu riba kua tin e 2900 potrètnan k’a haña bèk. Riba murayanan di glas a skibi e nòmbernan dje muchanan asesiná: kasi 18.000.

Tambe lo kont’e storia di djesinku mucha di Amsterdam mediante artefáktonan personal: diarionan, potrètnan di famia, dibuhonan, rapòrtnan di skol, kartanan i álbùmnan pa poesia di rekuerdo pa amigu.

In Memoriam t’un monumento p’e 17.964 muchanan k’a bin haña nan morto sin nòmber. Awor, nan a haña nan nòmbernan bèk: di Anny Aa te ku Abraham van der Zyl.

_____________________________________________________

In Memoriam, de gedeporteerde en vermoorde Joodse, Roma en Sinti kinderen, 1942 – 1945, di Guus Luijters i Aline Pennewaard, kas editorial Nieuw Amsterdam.

Ekshibishon na Stadsarchief Amsterdam te ku 20 di mèi 2012.