Awe Onsena hulandes ta hunga su promé partido kontra Dinamarka. Jetro Willems (18 ana) ta den base. E leftbèk hóben ta bini di Kòrsou i a lanta na Rotterdam. Abdi i Tarek, su amigunan di ántes, tin tur konfiansa den dje.

“Ántes mi a hunga futbòl hopi ku Jetro. For di tempu ku nos tabata chikí bo por a mira kaba ku e lo bira un bon hungadó.” Meskos ku Jetro Tarek a lanta den De Slinger, un parti sentral di e barionan na Rotterdam Pendrecht i Zuidwijk. “E bario no tabata seif. Tabatin tiramentu ku hinkamentu. E kosnan ei ta dunabo un bista diferente riba bida. Bo ta mira mas mihó kiko ta berdaderamente importante pa bo.”

No tabatin kriminal so
Pa e tres mucha hòmbernan semper esaki tabata futbòl. Ounke ku ta Jetro so a logra nivel internashonal. “Tur mucha hòmber tin un soño asina ma e no ta pa tur”, Tarek ta konta. “Ta dependé di bo kalidatnan, di e manera ku bo ta desaroyá i hendenan ku bo topa pero di suerte tabe. Bo por ta e mihó futbolista di mundu pero si bo no tin suerte, bo por resultá henteramente otro kaminda.”

Tarek a bai HBO i ta studia ekonomia komersial. Abdi tambe ta studia. “Na Rotterdam-Zuid no ta kriminal so tin, ma tin mucha ku ta traha duru tambe. Nos ta un ehèmpel di esaki, i mi ta kontentu ku Jetro por mustra henter Oropa esaki.”

Logro ta mihó ku edat
I awe e ta hunga kontra Dinamarka. E kuenta ku e lo ta muchu hóben i sin eksperiensha su amigunan di antes ta haña koí kèns. Van Marwijk a mustra sufisiente konfiansa den dje pa lag’é hunga kontra Dinamarka. “Si e no tabata bon lo e no tabata aden. Esei no tin nada di hasi ku su edat”, segun e amigunan.