Koló bèrdè di AVP i esun hel di MEP ta dominá bista riba kaya na Aruba, pero aki i aya por mira kòrá (PDR)i ros (MPA) tambe debésenkuando. A fèrf kasnan kompleto den koló di partido. Anto tin masha hopi bandera ta kologá, den tòp di mata, riba dak di bibienda i sobretodo riba outo.

Anke ku a sera kampaña di e ocho partidonan, por mira i skucha e simpatisantenan na diferente bario te ku dia di elekshon. Bispu di elekshon ta kore kumpra serbes i bibida stèrki warda na kas, pasobra riba e dia mes di elekshon ta prohibí di bende alkohòl.

"Ta un be den kuater aña ku bo por usa bo derechi di voto pa kambia òf pa keda ke mes gobièrnu", segun un sindikalista, turesten ku e ta kumprando un kantidat formal di bibida pa su famia. E ta bisa ku mayoria ámtenar ke vota pa kore ku MEP, pasó nan a keda sin haña indeksashon, o sea ku no a adaptá nan salario na oumento di kosto di bida.

Opinionnan variá
Ma un señora ke yùist pa MEP sigui goberná. E ta bai vota pa minister Marisol Tromp, komo ku el a pèrkurá pa bon kas i skol.  "MEP ta bai gana!", asina e ta bisa ku konvikshon. I asina e opinion i pronóstikonan ta varia di persona pa persona.

E kampaña tabata intenso i asta a surgi poko gòlpi fuerte. A pone asta bòrchi den shap pa prohibí diskushon riba polítika. No opstante e rivalidat ta ménos grandi ku den e añanan anterior , asina un hende di. "Antes famia i amistat tabata habri for di otro. E biaha akí kos ta basta pasivo." Kon ku para keda, e ta bira un fiesta sí, asina mayoria paseante ta bisa. "Henter siman nos tin fiesta."
 

Kontenido
Ta algun individuo so ta parse di ta wak programa elekoral bon. Un kabayero ta bisa ku e kampaña ta parse mas bien karnaval i ku no ta trata di polítika. E ke pa Aruba keda en todo kaso bou di Hulanda ku e státùs aparte manera e ta awor. Ta p'esei e ta vota MEP, ku a hasi outonomia tópiko di elekshon: "Tabata bayendo basta bon, awèl laga nos purba kuater aña mas." Pero e no tin bandera: "Mi no ta fanátiko. Mi ta bai vota, despues mi ta bai kas." Un otr'un kabayero no ta bai vota mes: "Mi tin ku traha. Kon ku bai bin, tur ta mesunkos."

Skucha koresponsal René Roodheuvel den kòmbersashon ku paseante riba kaya na Aruba.