Minister di integrashon Gerd Leers ke sali for di e terminologia 'alóktono'. E ta haña ku mester yama tur hende ku a nase na Hulanda, hulandes. Glenn Helberg, presidente di OCaN ta di akuerdo ku Leers. "A bira tempu pa porfin nos stòp di uza e palabra ei."

Helberg: "Mi lo ta kontentu pa minister Leers, si e logra. E terminologia alóktono ta kargá ku negativismo i esei nunka no por ta bon. Ora trata sierto grupo negativamente, otro ta sinti nan mes bon i nan ta pensa ku nan tin mag di tuma medida."

Partner tolerante PVV no ta niun tiki di akuerdo ku e minister di CDA. E partido di Geert Wilders ta haña ku asina akí Leers ta tapa kos. "Si direpente bo hasi e di dos generashon di alóktono tambe hulandes, bo ta susha estadistikanan i bo ta hunga ku realidat", asina parlamentario di PVV, Van Klaveren a bisa e minister resientemente.

Kriminalidat
Helberg ta kere ku PVV ke keda mará na e terminologia 'alóktono' pa ilustrá kriminalidat. E ta enfatisá ku kriminalidat no tin nada di haber ku esaki. "Etnisidat nunka no ta un motibu ku ta buta hende kai den sierto situashon. Etnisidat no ta un hustifikashon pa kua kondukta ku ta."

Reakshon di hende riba kaya rib'e plannan di Leers ta varia mashá. Tin ta haña ku enberdat e palabra 'alóktono' ta fèrfelu. Un dama sürnam ta bisa: "Nos ta nasé hulandes", maske nos a nase na Sürnam. Un rubiano ta proponé un terminologia nobo: "Emigrante lo ta un bon palabra, pasobra nos a emigrá bin Hulanda." Pero komo ku e no sa kon tin ku yama e siguiente generashon ku a nase na Hulanda, e ta proponé pa keda uza 'alóktono' mes.

Helberg di Overlegorgaan Caribische Nederlanders a yega di pensa mas biá riba un denominashon nobo. E ta bisa: Tin diferente minister ta proponé pa yama hende simplemente segun nan desendensha: ‘hulandes sürnameo’ i ‘hulandes marokano’. Un di e kosnan ku a resultá for di investigashon ta ku ora un persona ta integrá den un otro komunidat, e ta tene kuenta di unda e ta bin i unda e ta bai. E kombinashon aki ta sòru pa éksito.